आंबोलीतून कोळ्याच्या नव्या प्रजातीचा शोध; अभ्यासक हेमंत ओगलेंच्या नावे नामकरण

मुंबई (प्रतिनिधी) - सह्याद्रीमधील जैवविविधतेचा हाॅटस्पाॅट मानल्या जाणाऱ्या आंबोलीमधून कोळ्याच्या नव्या प्रजातीचा शोध लावण्यात आला आहे. 'ट्रॅपडोर' कोळ्याची ही नवी प्रजात 'कॉनोथीले' या कुळातील आहे. या कोळ्याचे नामकरण 'कॉनोथीले ओगलेई' असे करण्यात आले असून 'काॅनोथीले' कुळातील ही सहावी प्रजात आहे.

जीवशात्रज्ञ राजेश सानप, स्वप्नील पवार, अक्षय खांडेकर आणि अनुराधा जोगळेकर यांनी ही प्रजात शोधून काढली आहे. याविषयीचे वृत्त मंगळवारी 'आर्थ्रोपोडा सिलेक्ट' या संशोधन पत्रिकेमध्ये प्रकाशित करण्यात आले. २०१६ साली आंबोलीमधील सर्वेक्षणादरम्यान आम्हाला ही प्रजाती सर्वप्रथम सापडल्याची माहिती संशोधक स्वप्निल पवार यांनी दिली. मातीत बीळ तयार करुन हा कोळी राहत असल्याने तो सहसा नजरेस पडत नसल्याचे त्यांनी सांगितले. गेल्या सहा वर्षांपासून या प्रजातीच्या नाविन्याबाबत संशोधन सुरू होते. गुणसूत्र चाचणी आणि बाह्यांगाचे परिक्षण करुन ही प्रजात विज्ञानाकरिता नवीन असल्याचे उलगडले. आंबोलीतील स्थानिक आणि वन्यजीव अभ्यासक हेमंत ओगले यांच्या नावे या प्रजातीचे नामकरण कॉनोथीले ओगलेई असे करण्यात आले आहे. आंबोलीमध्ये करत असलेल्या संवर्धन कार्याविषयीच्या योगदानाबद्दल या प्रजातीला ओगलेंचे नाव देण्यात आले आहे.