राज्याचे 'पार्किंग' धोरण लवकरच आणण्यात येणार

मुंबई महानगर क्षेत्र विकास प्राधिकरणाचे परिवहन विषयक मुद्द्यांवर मंत्री प्रताप सरनाईक यांनी बैठकीचे आयोजन केले होते. या बैठकीदरम्यान त्यांनी ही माहिती दिली. अतिरिक्त मुख्य सचिव ( परिवहन) संजय सेठी, परिवहन आयुक्त विवेक भीमनवार यांच्यासह मुंबई महानगर प्रदेशात येणाऱ्या सर्व महापालिकाचे आयुक्त या बैठकीला उपस्थित होते.

यावेळी माहिती देताना मंत्री सरनाईक म्हणाले, एकात्मिक पार्किंग धोरण आणण्याअगोदर त्याची अंमलबजावणी करण्याच्या दृष्टीने कोणती त्रुटी राहू नये. ज्या महापालिका क्षेत्रामध्ये वाहतूक समस्या जटिल आहे त्या महापालिका आयुक्तांच्या सूचना,अभिप्राय यांचा विचार होणे अत्यंत आवश्यक आहे. वाहनधारकाकडे स्वतःची पार्किंग व्यवस्था नसेल तर ते संबंधित स्थानिक स्वराज्य संस्थेने उपलब्ध करून देणे गरजेचे आहे. महापालिका क्षेत्रामध्ये अशा पार्किंग जागा विकसित करण्याला प्रोत्साहन देणे ही काळाची गरज आहे. राज्यासाठी पार्किंग धोरण तयार करत असताना सुरुवातीला मुंबई महानगर क्षेत्र विकास प्राधिकरणामध्ये येणाऱ्या महापालिकांमध्ये प्रभावीपणे राबवावे असे राज्याचे मुख्यमंत्री देवेंद्र फडणवीस यांनी सुचवले आहे. त्यानुसार ही बैठक बोलण्यात आली होती.

यावेळी बोलताना मंत्री सरनाईक पुढे म्हणाले की, प्रत्येक महापालिकेने त्यांच्या उद्यान आणि मैदानाच्या खाली भूमिगत पार्किंगची व्यवस्था निर्माण करावी. ठाणे महापालिकेने मैदानाच्या खाली तयार केलेले वाहनतळ त्याचे उत्तम उदाहरण आहे. तसेच रस्त्यावरील अनाधिकृत पार्किंग हटवण्यासाठी पोलीस प्रशासन व मोटार परिवहन विभागाच्या मदतीने प्रभावी अंमलबजावणी करावी.