अखेर, बहुचर्चित पाणबुडी प्रकल्प सिंधुदुर्गात आला... सिंधुदुर्गच्या समुद्रतळाशी विराजमान जहाजची सफर करता येणार

मुंबई : यावेळी उपमुख्यमंत्री एकनाथ शिंदे, उपमुख्यमंत्री अजित पवार, महिला व बालविकास मंत्री आदिती तटकरे, पर्यटन मंत्री शंभूराज देसाई, मत्स्यव्यवसाय मंत्री नितेश राणे, मुख्य सचिव सुजाता सौनिक आणि मंत्रिमंडळातील सदस्य उपस्थित होते.


भारतातील हा पहिलाच उपक्रम असून यामुळे सागरी संवर्धन व पर्यटनाला चालना मिळणार आहे. केंद्र शासनाने ऐतिहासिक पाऊल उचलत भारतीय नौदलाचे निवृत्त जहाज आयएनएस गुलदार हे महाराष्ट्र पर्यटन विकास महामंडळाकडे सुपूर्द केले आहे. जगातील अनेक देशात असे प्रकल्प तयार केले आहेत. हा प्रकल्प तयार करण्यासाठी प्रधानमंत्री नरेंद्र मोदी व संरक्षण मंत्री राजनाथ सिंग यांच्या मान्यतेने भारतीय नौदलाने निवृत्त युद्धनौका महाराष्ट्र पर्यटन विकास महामंडळास विना मोबदला उपलब्ध करून दिली आहे.


या जहाजाचे वजन १,१२० टन आहे तर लांबी ८३.९ मीटर असून रुंदी ९.७ मीटर आहे. ५.२ मीटर इतकी खोली आहे. हे जहाज १२ जानेवारी २०२४ रोजी सेवानिवृत्त झाले आहे. केंद्र शासनाच्या वैशिष्ट्यपूर्ण पर्यटनस्थळांचा विकास करणे या योजनेंतर्गत ‘स्पेशल असिस्टंट्स टू स्टेटस फॉर कॅपिटल इन्व्हेस्टमेंट’ अंतर्गत या प्रकल्पास केंद्रीय पर्यटन मंत्रालयाने २७ डिसेंबर २०२४ रोजी रु.४६.९१ कोटीस मान्यता दिली आहे. भारतीय नौदलाने हे निवृत्त जहाज पोर्टब्लेअर, अंदमान येथून कारवार नेव्हल बेस, कर्नाटक या ठिकाणी स्वखर्चाने पोहोच करण्याची महाराष्ट्र पर्यटन विकास महामंडळाची विनंती मान्य केली, ज्यामुळे राज्य शासनाची आर्थिक बचत झाली आहे.


प्रकल्पाचे टप्पे


- भारतीय नौदलाकडून बोटीचा अधिकृतरित्या ताबा
- २२ फेब्रुवारी २०२४ रोजी कारवार नेवल बेस येथे बोटीचा अधिकृत ताबा
- कारवार येथून बोट विजयदुर्ग,सिंधुदुर्ग येथे जहाज आणले.
- १६ मार्च २०२५ रोजी जहाज यशस्वीरित्या महाराष्ट्र सागरी मंडळाच्या जेट्टीवर
- जहाज विना मोबदला ६-७ महिने सुरक्षितरित्या जेट्टीवर राहणार
- जहाजाची १५ एप्रिल २०२५ रोजी पर्यावरणीय साफसफाई पूर्ण
- माझगाव डॉक शिपबिल्डर्स लिमिटेड यांना १६ एप्रिल २०२५ रोजी कार्यादेश
- वातावरण अनुकूल असेल त्यादिवशी प्रत्यक्षपणे ही कार्यवाही पार पडणार
- सिंधुदुर्गातील समुद्राच्या तळाशी निवती रॉक येथे जहाज विराजमान होणार
- प्रवाळ निर्मितीनंतर स्कुबा डायव्हिंग आणि समुद्रतळाशी जहाजाची सफर