पर्यटन की दहशतपेरणी?

 

 

पाकिस्तानमध्ये अल्पसंख्याक समुदायाची किती दुरवस्था आहे, हे सांगण्यासाठी कोणत्याही पाश्चिमात्य संस्थेच्या अहवालाची गरज नाही. पाकिस्तानमध्ये अल्पसंख्यांकांवर कधी ईशनिंदेच्या आरोपाखाली, तर कधी दुसर्‍या कारणाने सतत अत्याचार होत असतात. ज्या उमरकोटमध्ये कोरिडॉर सुरू करण्याची गोष्ट पाकिस्तान करत आहे, तो जिल्हा पाकिस्तानमधील एकमेव हिंदू बहुसंख्य जिल्हा आहे. उमरकोटमध्ये 52 टक्के हिंदू राहतात. पण, उमरकोटमधील एकही लोकप्रतिनिधी हा हिंदू धर्माचा नाही. या जिल्ह्यातील सरकारी नोकर्‍यांपासूनही हिंदूंना दूर ठेवले जाते. ज्या कर्तारपूर कॉरिडोरला सुरू करून पाकिस्तानने आपली धार्मिक सहिष्णुता दाखवण्याचा प्रयत्न केला, तेथे पाकिस्तान दरबार साहेब गुरूद्वारा दर्शनासाठी येणार्‍यांकडून 20 डॉलर शुल्क घेते. गोष्ट फक्त पैशांचीच नाही, कर्तारपूर कॉरिडोरच्या जवळच पाकिस्तान पुरस्कृत दहशतवाद्यांचे प्रशिक्षण केंद्र असल्याची माहिती तपासयंत्रणांना मिळालेली आहे. कर्तारपूर कॉरिडोरच्या आडून पाकिस्तान भारतात अशांतता पसरवण्याचे काम करू शकतो, अशी शंका याआधी वर्तवण्यात आली आहे. शोकांतिका म्हणजे, पाकिस्तान आपल्या देशात हिंदू आणि जैन धर्मीयांना धार्मिक पर्यटनासाठी एकीकडे पायघड्या टाकत असताना, जम्मू-काश्मीरमध्ये पाकपुरस्कृत दहशतवाद्यांनी हिंदू भाविकांच्या बसला लक्ष्य करत दहा निष्पाप लोकांचा बळी घेतला. त्यामुळे पाकच्या भूलथापांना बळी न पडता, आपण त्यांच्या नांग्या ठेचल्या पाहिजेत. तेव्हाच खर्‍या अर्थाने आपले धर्मकार्य पूर्ण होईल!