आकडेमोड नि डोकेफोड!

 

त्याउलट भाजप नेते ‘400 पार’चा नारा सतत देत आहेत. अमित शाह यांनी तर दर टप्प्यानंतर भाजपला किती जागी विजय मिळाला आहे, त्याचे भाकितही करण्यास प्रारंभ केला आहे. काहीजणांच्या मते, हा फाजिल आत्मविश्वास आहे, पण निदान त्यांचे दावे सुसंगत तरी आहेत. अमित शाह सोडल्यास भाजपचे अन्य नेते आकडेवारीवर बोलताना दिसत नाहीत. त्यामुळे भाजपमध्ये तरी आपल्याला मिळणार्‍या जागांबाबत संभ्रम नाही, असे चित्र दिसते. आपल्या आघाडीला आणि भाजपला गेल्या निवडणुकीपेक्षा अधिक जागांवर विजय मिळेल, या आत्मविश्वासाचे दर्शन भाजप नेत्यांच्या वक्तव्यांतून घडते आणि त्यामुळे मतदारांना एक प्रकारचा दिलासा मिळतो. ‘एनडीए’चा नेता कोण आहे, याबाबतही प्रश्नचिन्ह नाही. मुळात मोदी हे जनमानसांच्या हृदयात विराजमान झाले असून, त्यांनाच पुन्हा पंतप्रधान करण्यासाठी भाजपने ‘अब की बार मोदी सरकार’ची घोषणा दिली आहे. मतदारही मोदी यांच्याकडे पाहूनच मतदान करीत आहेत. 2019 मध्ये भाजपला 303 जागांवर विजय मिळाला होता. यावेळी त्यापेक्षा अधिक जागांवर भाजपला विजय मिळेल, याबद्दल भाजपसह अनेक राजकीय विश्लेषकांचेही एकमत आहे.

 

उर्वरित दोन टप्प्यांमध्ये ज्या जागांवर मतदान होणार आहे, त्या सर्व जागा उत्तर भारतातील आहेत. त्यात उत्तर प्रदेशमधील 27, दिल्लीतील सर्व सात, हिमाचलमधील चार, हरियाणातील दहा, झारखंडमधील सात, प. बंगालमधील उर्वरित 15, ओडिशातील उर्वरित 12, बिहारमधील 16 आणि पंजाबमधील सर्व 13 जागांवर मतदान होणार आहे. यातील दिल्ली, हिमाचल, हरियाणा यातील सर्व जागी भाजपला विजय मिळाला होता, तर उत्तर प्रदेशातील 27 पैकी 20 जागी विजय मिळविला होता. यावेळी 2019च्या तुलनेत भाजपला प. बंगाल आणि ओडिशा या राज्यांमध्ये वाढीव जागा मिळतील, असे भाकित बहुतांशी राजकीय विश्लेषकांनी केले आहे. त्या सार्‍याचा विचार करता एकंदरित सहावा टप्पा भाजपसाठी लाभदायकच असेल, यात शंका नाही. त्यामुळे भाजप आपल्या ‘400 पार’च्या घोषणेच्या जवळ जाऊन बसेल, अशीच चिन्हे आहेत.आपल्या कार्यकर्त्यांचे आणि आपल्या समर्थक मतदारांचे मनोबल उच्च राखण्यासाठी सर्वच पक्षांचे नेते आपल्याला विजय मिळणार असल्याचा दावा करतात, हे समजण्यासारखे आहे. पण, या दाव्याला थोडातरी वास्तवाचा आधार किंवा टेकू असेल, तरच मतदारांनाही त्याबद्दल विश्वास वाटू शकतो. दोनच दिवसांपूर्वी अखिलेश यादव यांनी दावा केला की, उत्तर प्रदेशातील सर्व 80 जागांवर आपली आघाडी विजयी होत आहे. त्यात अगदी वाराणसीच्या मतदारसंघाचाही समावेश आहे! म्हणजे वाराणसीतून नरेंद्र मोदी हे निवडणूक हरणार आहेत, असे अखिलेश सांगत आहेत. यासारख्या वक्तव्यांनी मतदारांचे मनोबल वाढेल, की अखिलेश यांच्या मानसिक स्थितीविषयी त्याच्या मनात शंका निर्माण होईल?‘इंडी’ आघाडी ही वेगवेगळी ठिगळे लावलेली गोधडी आहे. या आघाडीतील पक्ष म्हणजे सत्तालालसेच्या गोधडीला लावलेली वेगवेगळी ठिगळे आहेत. एका ठिगळाचा दुसर्‍याशी काहीही संबंध नाही. त्यातील कोणते ठिगळ कधी उसवेल आणि गोधडी सोडून बाहेर पडेल, याचाही भरवसा नाही!