साठ्ये महाविद्यालयत भरणार प्राचीन काळातील अनेक दुर्मिळ आणि मौल्यवान वस्तूंचे प्रदर्शन

 

 

मुंबई : पार्ले टिळक विद्यालय असोसिएशनचे साठये महाविद्यालय (स्वायत्त), प्राचीन भारतीय संस्कृती व पुरातत्त्व विभाग, बौद्धविद्या विभाग , प्राणिशास्त्र विभाग, पुरातत्त्व विभाग, मुंबई विद्यापीठ, पर्यटन मंत्रालय , भारत सरकार, लब्धी विक्रम जनसेवा ट्रस्ट, अहमदाबाद, इन टू द पास्ट हेरिटेज, मराठी देशा फाऊंडेशन, पुरासंस्कृती, आणि अश्वमेध प्रतिष्ठान यांच्या संयुक्त विद्यमाने चार दिवसीय पुरातत्त्व भव्य प्रदर्शनाचे आयोजन करण्यात आले आहे. १९ डिसेंबर ते २२ डिसेंबर २०२४ या कलावधीत ‘पार्ले टिळक विद्यालय असोसिएशनचे साठये महाविद्यालय (स्वायत्त), विलेपार्ले (पूर्व)’ येथे सकाळी ९ ते सायं. ६ या वेळेत हे प्रदर्शन भरविण्यात येणार आहे. नुकत्याच पार पडलेल्या भारतीय पुरातत्त्वशास्त्राचे शिल्पकार डॉ. ह. धी. सांकालिया यांच्या जन्मदिवसाचे औचित्य साधून हे प्रदर्शन आयोजित करण्यात आले आहे.

 

दहाव्या शतकाच्या काळातील अप्रतिम शिल्पे, रामायण आणि महाभारताची हस्तलिखिते, तसेच जुन्या काळातील नाणी आणि शिलालेख, प्राचीन भांडी आणि दुर्मिळ पुराजैवशास्त्रीय नमुने अशा प्राचीन काळातील अनेक दुर्मिळ आणि मौल्यवान वस्तू या प्रदर्शनात पाहायला मिळतील. अभ्यासकांपासून सामान्यांपर्यंत हे प्रदर्शन आहे. प्राचीन इतिहासाला जिवंत अनुभवण्याची इतिहास प्रेमींसाठी ही एक सुवर्ण संधी आहे. हे प्रदर्शन सर्वांसाठी खुले राहील. यासाठी कोणतेही नोंदणी शुल्क नाही.