तिखटानंतर गोड ‘जिलबी’ हवीच...मराठीतला ब्लॉकबस्टर ‘बॉईज ४’ येणार भेटीला

मराठी चित्रपटांच्या इतिहासातील सुपरहिट ब्लॉकबस्टर ’बॉईज’च्या सीरिजने प्रेक्षकांचे भरभरून मनोरंजन केले. या चित्रपटाच्या यशस्वी तीन भागांनंतर ’बॉईज ४’ धमाका करायला येत आहेत. पुन्हा एकदा ढुंग्या, धैर्या आणि कबीर यांची धमाल मस्ती प्रेक्षकांना अनुभवता येणार आहे. ‘बॉईज ४’ या चित्रपटाचे वैशिष्ट्य म्हणजे, मराठी चित्रपटसृष्टीतील हा एकमेव चित्रपट आहे, ज्याचे चार भाग आले आहेत. या चित्रपटात पार्थ भालेराव, प्रतीक लाड, सुमंत शिंदे प्रमुख भूमिकेत असणार आहेत.

विनोदाचे अचूक टायमिंग साधणं, हे मराठीतील फार कमी कलाकारांना खर्‍या अर्थाने जमतं, असं म्हटल्यास वावगे ठरणार नाही. त्या कलाकारांच्या यादीत अभिनेते भरत जाधव यांचे नाव आघाडीवर. अनेक चित्रपटांत विविधांगी भूमिका साकारणारे भरत जाधव ’लंडन मिसळ’ या चित्रपटातून बर्‍याच वर्षांनी मराठी चित्रपटसृष्टीत पुनरागमन करणार आहेत. ’लंडन मिसळ’ ही आदिती आणि रावी या लंडनमध्ये राहणार्‍या दोन सख्ख्या बहिणींची कथा. आपल्या वडिलांचे स्वप्न पूर्ण करण्यासाठी अनेक अडचणींचा सामना त्यांना करावा लागतो आणि त्यावेळी ज्या-ज्या परिस्थितीतून जावे लागते, त्याची कथा म्हणजे ’लंडन मिसळ.’ अभिनय, संगीत, नृत्य आणि खळखळून हसवणारे विनोद यांची जुगलबंदी ‘लंडन मिसळ’ या चित्रपटात अनुभवायला मिळणार आहे. अनेक वर्षांनी पुन्हा चित्रपटात झळकणार्‍या भरत जाधव यांनी या चित्रपटात ‘रॅप’ गाणेदेखील गायले आहे. या चित्रपटात ऋतुजा बागवे, रितिका श्रोत्री, माधुरी पवार, गौरव मोरे, निखिल चव्हाण, ऋतुराज शिंदे आणि सुनील गोडबोले प्रमुख भूमिकेत आहेत.