पुणे आकाशवाणीचा वृत्त विभाग पुण्यातच राहणार; केंद्रीय माहिती व प्रसारण मंत्रालयाचा निर्णय

नवी दिल्ली : पुणे आकाशवाणीचा वृत्त विभाग छत्रपती संभाजीनगर येथे हलविण्याचा निर्णय रद्द करण्यात आला असून वृत्त विभागच पुण्यातच कार्यरत राहणार असल्याचा निर्णय केंद्रीय माहिती व प्रसारण मंत्रालयाने घेतला आहे. त्यासाठी भाजप नेते आणि भारतीय सांस्कृतिक संबंध परिषदेचे अध्यक्ष डॉ. विनय सहस्रबुद्धे यांनी विशेष प्रयत्न केले होते. आकाशवाणीच्या पुणे केंद्रावरुन सकाळी आणि सायंकाळी अशी एकूण चार बातमीपत्रे सादर केली जातात. अनेक वर्षांपासून सादर होणाऱ्या या बातमीपत्रांचा श्रोतावर्गही अतिशय मोठा आहे. केंद्रीय माहिती व प्रसारण मंत्रालयाने पुणे आकाशवाणीचा प्रादेशिक वृत्त विभाग छत्रपती संभाजीनगर आकाशवाणी केंद्रात विलीन करण्याचा निर्णय घेतला होता. केंद्राच्या या निर्णयाविरोधात मोठ्या प्रमाणात नाराजीचा सूर उमटला होता.

याविषयी भाजपचे ज्येष्ठ नेते डॉ. विनय सहस्रबुद्धे यांनी केंद्रीय माहिती व प्रसारण मंत्री अनुराग ठाकूर यांच्याशी सविस्तर चर्चा केली होती. पुणे आकाशवाणीचा प्रादेशिक वृत्त विभाग पुण्यातच असणे आवश्यक असल्याचे डॉ. सहस्रबुद्धे यांनी यांनी केंद्रीय मंत्री ठाकूर यांना सांगितले होते. त्यानंतर गुरुवारी केंद्रीय मंत्री ठाकूर यांनी वृत्त विभाग पुण्यातच राहिल, अशी ग्वाही दिली होती. त्यानुसार, मंत्रालयाने निवेदन जारी करून पुढील आदेश येईपर्यंत पुणे आकाशवाणीचा वृत्त विभाग पुण्यातच कार्यरत राहणार असल्याचे स्पष्ट केले आहे.

पुणे आकाशवाणी केंद्रावरुन दररोज सकाळी ७.१० वाजता आणि ८.३० वाजता मराठीमधून राष्ट्रीय बातमीपत्र दिले जाते. यासोबतच ८ वाजता, १०.५८ वाजता आणि ११.५८ वाजता दोन दोन मिनिटांचे बुलेटीन (एफएम हेडलाईन) चालविले जाते. पुढील आदेश होईपर्यंत ही बातमीपत्रे सुरु राहतील.

आकाशवाणी केंद्रावरून प्रसारित होणार्‍या बातम्यांचे युनिट छत्रपती संभाजीनगर हलवण्याचा निर्णयाला केंद्रीय मंत्री अनुराग ठाकूर यांनी स्थगिती दिली आहे. मी त्यांच्याशी संपर्क साधून या संदर्भात चर्चा केली होती. तसेच प्रसार भारतीचे अपूर्व चंद्र आणि मुख्य कार्यकारी अधिकारी द्विवेदी यांच्याशीही त्यांची चर्चा केली होती. त्यानंतर हा निर्णय घेण्यात आला. या बाबत स्वतंत्र सविस्तर चर्चा दिल्लीत गेल्यानंतर होईल.

आकाशवाणीच्या पुणे केंद्रावरुन प्रक्षेपण होणारे प्रादेशिक बातमीपत्र बंद करु नये, यासाठी मी केंद्रीय केंद्रीय माहिती आणि प्रसारण मंत्री अनुराग ठाकूर यांना पत्र लिहून विनंती केली होती. पुणेकर आणि लोकभावनेचा आदर करुन अनुराग ठाकूर यांनी आकाशवाणी पुणे केंद्राचे प्रादेशिक बातमीपत्र बंद करण्याच्या निर्णयास स्थगिती दिली. त्याबद्दल अनुराग ठाकूर यांचे मनापासून आभार. तसेच सर्व पुणेकरांचे अभिनंदन. आकाशवाणी पुणे केंद्राचे प्रादेशिक बातमीपत्र यापुढेही कायमस्वरूपी सुरू ठेवण्यासाठी लवकरच धोरणात्मक निर्णय होईल, असा मला विश्वास आहे.