तमिळनाडूतून नव्या विंचवाच्या जातीचा शोध!

\

 

  

 

 

 

मुंबई(प्रतिनिधी): तमिळनाडूमधून नव्या विंचवाच्या प्रजातीचा शोध लावण्यात आला आहे. नव्याने सापडलेली प्रजाती ही हॉरमुरीडी कुळातल्या चिरोमॅचेटस या जातीमधील आहे. या बाबतचा शोधनिबंध हा निबंध दि. २२ जून रोजी अमेरिकेच्या मार्शल विद्यापीठाच्या 'युस्कॉर्पिअस' या आतंरराष्ट्रीय संशोधन पत्रिकेतून प्रकाशित करण्यात आला आहे. ठाकरे वाईल्डलाईफ फाउंडेशनच्या अक्षय खांडेकर; तेजस ठाकरे; स्वप्निल पवार; सत्पाल गंगलमाले; आणि विवेक वाघे यांनी संयुक्त पणे हा शोध लावला आहे.

 

 

'अगस्त्यामलाई' शिखराजवळ हा विंचु आढळून आला म्हणून त्याचे नामकरण (चिरोमॅचेटस अगस्त्यामलाएनसीस) असे करण्यात आले आहे. ही जाती चिरोमॅचेटस जात ही भारतीय द्विपल्कासाठी प्रदेशनिष्ठ असून त्यात आतापर्यंत पाच प्रजाती विज्ञानाला ज्ञात होत्या, आता नव्याने शोध लागलेल्या प्रजातीमुळे ही संख्या सहावर गेली आहे. पाच मधील तीन प्रजाती या महाराष्ट्र, एक केरळ, आणि एक आंध्रप्रदेश मधून ज्ञात होत्या, तमिळनाडूत 'चिरोमॅचेटस' या जातीची ही पहिलीच नोंद आहे. ही जाती तमिळनाडूमधील तिरुनेवेली जिल्ह्यातील अगस्त्यामलाई शिखराजवळ समुद्रसपाटीपासून ९०० ते ११५० मीटर उंचीवर एप्रिल २०२१ मध्ये आढळून आली होती. या प्रजातीच्या नमुन्यांवर साधारण वर्षभर संशोधन केल्यानंतर ही प्रजाती अगोदर ज्ञात असलेल्या कुठल्याही प्रजाती पेक्षा वेगळी असल्याचे लक्षात आले. आणि नंतर त्यासंबंधीचा संशोधन निबंध सादर करण्यात आला. आतंरराष्ट्रीय विंचुतज्ञानी सदर संशोधनाबाबतची पडताळणी करून पुष्टि केल्यानंतर हा निबंध २२ जून रोजी अमेरिकेच्या मार्शल विद्यापीठाच्या युस्कॉर्पिअस या आतंरराष्ट्रीय संशोधन पत्रिकेतून प्रकाशित करण्यात आला.