मराठी भावगीत आणि भक्तीगीत खासगी रेडिओवरून नियमित प्रसारित करा

- सांस्कृतिक कार्य मंत्री आशिष शेलार यांची सूचना

21-May-2025

Total Views | 10

मराठी भावगीत आणि भक्तीगीत खासगी रेडिओवरून नियमित प्रसारित करा

मुंबई, ग्रामोफोन आणि कॅसेटच्या जमान्यातील मराठी भावगीत, भक्तीगीते आजही मराठी मनावर अधिराज्य करणारी आहेत. त्यामुळे आजच्या नव्या रेडिओ स्टेशनवरून ही भावगीत आणि भक्तीगीते नियमित प्रसारित करा, अशी सूचाना सांस्कृतिक कार्य मंत्री आशिष शेलार यांनी बुधवार, दि. २१ मे रोजी केली.

मंत्रालयातील दालनामध्ये शेलार यांनी खासगी रेडिओ क्षेत्रातील प्रतिनिधींशी संवाद साधला. रेडिओ या माध्यमातून मराठी भाषेला प्राधान्य मिळावे तसेच सरकार आणि खासगी रेडिओचे नवे जग यामध्ये समन्वय असावा, यासाठी हा संवाद आयोजित करण्यात आला होता. भाजपच्या पदाधिकारी हेतल मेहता यांच्या पुढाकाराने झालेल्या या बैठकीत रेड एफएम, रेडिओ सीटी ९१.१, यांच्यासह या क्षेत्रातील प्रतिनिधी, आरजे उपस्थित होते.

रेडिओ क्षेत्रातील आव्हाने आणि अडचणींबद्दल यावेळी चर्चा करण्यात आली. मंत्री शेलार यांनी सांगितले की, आमच्या बालपणीचा काळ हा आकाशवाणीवरुन लागणाऱ्या गीतांशी जोडलेला होता. आमची पिढी ही त्याकाळी रेडिओ वरुन वाजणाऱ्या गीतांच्या एका प्रभावात वाढलेली आहे. महाराष्ट्रातील दर्शक हे भाव आणि भक्तीगीतांशी एका वेगळ्या नात्याने जोडलेले आहेत. आजही शहरापासून खेड्या पर्यंत सत्यनारायणाची पुजा असली की, प्रल्हाद शिंदे यांची अजरामर गीते वाजल्याशिवाय सत्यनारायणाची पुजा आहे असे वाटतच नाही. अशाच प्रकारे कॅसेटच्या जमान्यातील भावगीत आणि भक्ती गीतांशी महाराष्ट्रातील तमाम श्रोतावर्ग जोडला गेलेला आहे त्यामुळे ही गाणी पुन्हा खाजगी रेडिओवरुन प्रसारित करा, महाराष्ट्र तुम्हाला नक्की प्रतिसाद देईल, असे मंत्री शेलार यांनी सांगितले.