सावधान! कोरोना पुन्हा डोके वर काढतोय! केरळसह, महाराष्ट्रात दिवसभरात १०० पेक्षा अधिक रूग्ण
Total Views |
मुंबई : २०२५ मध्ये भारतात कोविड-१९ रुग्णसंख्या वाढत आहे. सध्या देशात ५,३६४ सक्रिय रुग्ण आहेत. गेल्या २४ तासांत ७६४ नवीन रुग्ण आढळले असून, ४ जणांचा मृत्यू झाला आहे. केरळ राज्यात सर्वाधिक १९२ नवीन रुग्ण नोंदवले गेले आहेत. महाराष्ट्रात ११४, गुजरातमध्ये १०७, पश्चिम बंगालमध्ये ५८, आणि दिल्लीमध्ये ३० नवीन रुग्ण आढळले आहेत.
महाराष्ट्रात पुणे आणि मुंबईमध्ये रुग्णसंख्या वाढत आहे. मुंबईत सक्रिय रुग्णांची संख्या ५०९ झाली आहे. नवीन NB.1.8.1 व्हेरिएंटमुळे रुग्णसंख्या वाढत आहे. या व्हेरिएंटमध्ये सौम्य लक्षणे दिसून येत आहेत, परंतु वृद्ध आणि आजारी व्यक्तींनी काळजी घ्यावी, असे सांगण्यात येते आहे.
केंद्र सरकारने सर्व राज्यांना हॉस्पिटल तयारीसाठी मॉक ड्रिल्स करण्याचे निर्देश दिले आहेत. ऑक्सिजन, व्हेंटिलेटर आणि औषधांचा पुरेसा पुरवठा आहे की नाही हे तपासण्यास सांगितले आहे.
कोविड-१९ पासून सुरक्षित राहण्यासाठी उपाय
१. मास्क वापरा: बाहेर जाताना किंवा गर्दीच्या ठिकाणी मास्क घालणे आवश्यक आहे.
२. हात स्वच्छ ठेवा: साबणाने सतत हात धुवा किंवा सॅनिटायझरचा वापर करा.
३.अंतर पाळा: इतरांपासून किमान १ मीटर अंतर ठेवा
४. लक्षणे आढळल्यास तपासणी करा: ताप, खोकला, थकवा, चव किंवा वास न येणे यासारखी लक्षणे दिसल्यास त्वरित तपासणी करा.
५. लसीकरण पूर्ण करा: लस घेतलेली नसल्यास त्वरित लस घ्या आणि बूस्टर डोसही घ्या.
६. गर्दी टाळा: गर्दीच्या ठिकाणी जाणे टाळा.
कोविड-१९ अजूनही आपल्या आजूबाजूला आहे. सावध राहून, योग्य खबरदारी घेऊन आपण स्वतःला आणि आपल्या कुटुंबाला सुरक्षित ठेवू शकतो.