शेपूट वाकडी ती वाकडीचं!

‘कुत्र्याची शेपूट वाकडी ती वाकडीचं’ अशी मराठीतील एक सुप्रसिद्ध म्हण पाकिस्तानच्या बाबतीत एकदम चपखलपणे बसते. शाहबाज शरीफ यांना पंतप्रधान बनवण्यासाठी, ज्या निवडणुकांचे नाटक पाकिस्तानमध्ये रचण्यात आले, त्यासाठीसुद्धा पाकिस्तानला दुसर्‍या देशांकडून कर्ज घ्यावे लागले, अशी कबुली खुद्द शाहबाज यांनी दिली. पाकिस्तान सध्या ‘आंतरराष्ट्रीय नाणेनिधी’च्या मदतीवर आपले दिवस काढत आहे, तरीही काश्मीरला तथाकथित स्वातंत्र्य मिळवून द्यायची भाषा शाहबाज करीत आहेत. काश्मीरवर शाहबाज बोलत असले, तरी शब्द मात्र पाकिस्तानी सैन्याचे!पाकिस्तानमध्ये महागाईने नवा उच्चांक गाठला. दुसरीकडे, इमरान खान यांना कितीही दाबण्याचा प्रयत्न केला, तरी त्यांची लोकप्रियता कमी होत नाही. काही आंतरराष्ट्रीय संस्थांनी केलेल्या सर्वेक्षणातून समोर आले आहे की, पाकिस्तानी सैन्याची लोकप्रियता दिवसेंदिवस कमी होत आहे.

सैन्याच्या थेट राजकीय सहभागामुळे पाकिस्तानमधील तरुणांमध्ये रोष वाढत आहे. त्यातच बलुचिस्तानची स्वातंत्र्य चळवळ शस्त्रांच्या जोरावर संपवण्यात, पाकिस्तानी सैन्याला अपयश आले आहे. इराण आणि अफगाणिस्तानसोबत सीमेवर अशांतता आहे. या सर्व मुद्द्यांवरून जनतेचे लक्ष विचलित करण्यासाठी, शाहबाज पुन्हा एकदा काश्मीर राग आळवताना दिसले.शाहबाज काश्मीरच्या स्वातंत्र्याच्या गप्पा मारताना, पाकव्याप्त काश्मीरला विसरून जातात. पंतप्रधान मोदींच्या नेतृत्वात रालोआ सरकारने ‘कलम ३७०’ हटवल्यानंतर, काश्मीरमध्ये विकासाची गंगा वाहत आहे. दुसरीकडे, पाकव्याप्त काश्मीरमध्ये लोकांना साधे गव्हाचे पीठ उपलब्ध नाही. यासाठी मोठ्या प्रमाणावर आंदोलनेसुद्धा पाकव्याप्त काश्मीर आणि खैबरपख्तुनख्वा भागात झाली. भारत सरकारने जम्मू आणि काश्मीरचा अंतरिम अर्थसंकल्प मांडला. या अर्थसंकल्पात केंद्र सरकारने काश्मीरच्या विकासासाठी १४.१६ अब्ज डॉलर दिले. दुसरीकडे, पाकिस्तान ‘आयएमएफ’कडे तीन अब्ज डॉलरची भीक मागत आहे.

 

भारताच्या जम्मू-काश्मीरमध्ये २ हजार, ८१२ रुग्णालये आहेत. या रुग्णालयांच्या माध्यमातून काश्मिरी जनतेचा सरकारच्या मदतीने मोफत उपचार होतो. दुसरीकडे पाकव्याप्त काश्मीरमध्ये फक्त २३ रुग्णालये आहेत. भारताच्या काश्मीरमधील सर्व घरांना २४ तास, सात दिवस कायमस्वरुपी वीज मिळते. दुसरीकडे, पाकव्याप्त काश्मीरमध्ये निर्माण होणारी वीज पाकिस्तानच्या इतर प्रातांना पाठवून, स्वत: पाकव्याप्त काश्मीर मात्र अंधारात. या सर्व घटनांमुळे पाकव्याप्त काश्मिरी जनतेमध्ये असंतोष उसळत आहे. या असंतोषाचाच परिणाम म्हणून पाकव्याप्त काश्मीरमध्ये भारताच्या समर्थनार्थ मोठ्या प्रमाणावर रॅली आयोजित केल्या जात आहेत. या रॅलीद्वारे भारतात सामील होण्याची मागणी केली जात आहे.