चोराची चोराला साक्ष

देशद्रोही ठरवून चीनने अनेक निष्पाप नागरिकांना तुरुंगात डांबले. हे निष्पाप लोक काय माणसं नाहीत? उघूर मुसलामानांसाठी खास तयार केलेली छळछावणी चीनमध्येच आहे. चिनी प्रशासन उघूर मुस्लिमांवर जे अत्याचार करतात, त्या अत्याचाराची एक भयंकर यादीच तयार होईल. अर्थात, याबद्दल जगभरातले एकजूट झालेले ५७ मुस्लीम देशही चकार शब्द उच्चारत नाहीत. दुसरीकडे, चीनमध्ये जगातील सगळ्याच धर्मांची लोक राहतात. मात्र, या सगळ्या धर्मांच्या लोकांना चिनी कम्युनिस्ट राजवटीप्रमाणे जगावे लागते. चीन स्वतः असा मानवी हक्काविरोधात वागतो. मात्र, इस्रायलला मानवता धर्म शिकवायला पुढे जातो. काय म्हणावे याला? जागतिक पटलावर चीनची कूकर्म पाहिले, अतिविस्तारवादी महत्त्वाकांक्षेपोटी केलेली कारस्थान पाहिली की वाटते, चीनची मानवता, बंधुता हा शब्द उच्चारण्याचीही पात्रता नाही.

सध्या चीनला ’हमास’चा पुळका आला आहे. दि. ७ ऑक्टोबर रोजी ’हमास’ने केलेला क्रूर आणि तितकाच भ्याड हल्ला सगळ्या जगाने पाहिला. मृत की अर्धमेली झालेली ती नग्न युवती, तिला जिपवर बांधून ’हमास’च्या राक्षसांनी केलेली, ती अत्यंत अमानवी परेड, शेकडो इस्रायली नागरिकांना बंधक बनवून, त्यांचे केलेले अपहरण. तो क्रूर हल्ला आणि त्यात मृत, जखमी झालेले ते इस्रायली नागरिक. या सगळ्या पार्श्वभूमीवर त्या बातम्या आठवतात. दि. ७ ऑक्टोबर रोजी ’हमास’चे अतिरेकी इस्रायलच्या एका घरात घुसले. तिथे १३ वर्षांची मुलगी अभ्यास करत होती. त्यांना पाहताच ती घाबरून रडू लागली, ती म्हणत होती की, ”मला मारू नका, उद्या माझी परीक्षा आहे. मला शाळेत जायचे आहे.”

नुकतेच इस्रायलने अमेरिकेच्या मदतीने ’हमास’च्या अतिरेक्यांनी केलेली क्रूरतेबद्दल पुराव्यासकट अहवाल सादर केला. त्यातून असे निष्पन्न होते की, बंधक बनवलेल्या बालक, स्त्री-पुरुषांवर ’हमास’च्या दहशतवाद्यांनी त्यांच्या कुटुंबासमोर अत्याचार केले गेले. त्यांच्या गुप्तांगावर बंदुकीने गोळ्या झाडल्या. स्त्रियांच्या योनीत ग्रेनेड टाकले. लिहितानाही अपार दुःख आणि संताप होत आहे, असे हे ’हमास’चे दहशतवादी. आज चीनला त्यांच्याबाबत मानवता आठवली आहे. अर्थात, ’हमास’ने जाहीर केले की, त्यांनी बंधक बनवलेल्या कुणाही इस्रायली नागरिकांवर अत्याचार केलेला नाही.

मात्र, सुटून आलेल्या बंधकांची वैद्यकीय तपासणी केली गेली. त्यातून सिद्धच झाले की, त्यांना त्रास दिला गेला होता. दुसरीकडे दिवसा पत्रकाराचा मुखवटा घालून, रात्री दहशतवादी कारवाया करणारे, ’हमास’चे अतिरेकी किंवा ’संयुक्त राष्ट्रसंघा’कडून आलेली मदत पदरात पाडून, रात्री दहशतवादी बनत रस्त्यावर उतरणारे, गाझापट्टीतले नागरिकही जगाने पाहिले. त्यामुळे तर अमेरिका, युरोपसहित अनेक पाश्चात्य राष्ट्रांनी ‘संयुक्त राष्ट्र संघा’ला गाझा पट्टीसाठी मदत देण्यास नकार दिला. या अशा पार्श्वभूमीवर चीनने गाझापट्टीतल्या लोकांच्या अधिकाराबाबत बोलणे म्हणजे चोराने चोराची साक्ष देणे, असेच म्हणावे लागेल.

९५९४९६९६३८