"इस्लाम स्वीकारा, सर्व आजार बरे होतील"; भुतबाधा झाल्याचे सांगत बळजबरीने धर्मांतराचा प्रयत्न

25-Nov-2023

Total Views | 44

लखनौ : उत्तर प्रदेशातील गाझियाबादमध्ये एका मौलवीवर एका हिंदू महिलेला बळजबरीने इस्लाम धर्म स्वीकारण्यास भाग पाडल्याचा आरोप करण्यात आला आहे. याशिवाय पीडित महिलेच्या कुटुंबातील सदस्यांवर दबाव टाकून त्यांचेदेखील धर्मांतर केले असल्याचे सांगण्यात येत आहे.

मिळालेल्या माहितीनुसार, हे प्रकरण नंदग्राम पोलीस स्टेशन परिसरातील असून मीनू असे पीडितेचे नाव आहे. पीडितेचा मुलगा अक्षय याने २४ नोव्हेंबर रोजी याप्रकरणी पोलिसात तक्रार दाखल केली आहे. सरफराज असे आरोपी मौलवीचे नाव आहे.

२०१७ मध्ये पीडित मीनू ही शारीरिक आणि मानसिक त्रासामुळे कंटाळली होती. यावेळी तिला कोणीतरी मौलवी सरफराजबद्दल सांगितले. त्यानंतर ती सरफराजकडे गेली असता सुरुवातीला त्याने तिला भुतबाधा झाली असल्याचे सांगत काही उपाय केले. परंतु, त्याचा काहीही उपयोग झाला नाही.

त्यानंतर जोपर्यंत ते हिंदू धर्मात राहतील तोपर्यंत त्यांच्या समस्या दूर होणार नाहीत, असे मौलवीने पीडित कुटुंबियांना सांगितले. एवढेच नाही तर मौलवी सरफराजने पीडित कुटुंबाला इस्लाम धर्म स्वीकारण्याचा सल्लाही दिला. त्यानंतर अक्षय आणि त्याच्या कुटुंबीयांनी मौलवीवर विश्वास ठेवत घरातील सर्व देवी-देवतांचे फोटो काढून टाकले आणि इस्लामी पद्धतीने सर्व कामे करू लागले.

तसेच मौलवी सरफराज त्याच्याकडे येणाऱ्या इतर लोकांनाही त्यांचा धर्म सोडून इस्लाम स्वीकारण्यास सांगत असल्याचे तक्रारीत म्हटले आहे. त्यानंतर पोलिसांनी पोलिसांनी याप्रकरणी गुन्हा दाखल करत आरोपी मौलवीचा शोध सुरू केला. अखेर २४ नोव्हेंबरला गाझियाबादमधून सरफराजला अटक करण्यात आली आहे.