आयआयडीएलच्या कार्य अहवालाचे प्रकाशन

 

 

 

मुंबई : रामभाऊ म्हाळगी प्रबोधिनीचा भाग असलेल्या आयआयडीएल इंडियन इन्स्टिटयूट ऑफ डेमॉक्रेटिक लीडरशीप (IIDL) या संस्थेने नुकतीच आपली पाच वर्षे पूर्ण केली. त्या निमित्ताने आयआयडीएलच्या कार्य अहवालाचे प्रकाशन नुकतेच करण्यात आले आहे. या सर्वसमावेशक पंचवार्षिक अहवालाच्या प्रकाशन सोहळ्यास राज्याचे उपमुख्यमंत्री आणि रामभाऊ म्हाळगी प्रबोधिनीचे अध्यक्ष देवेंद्र फडणवीस यांच्यासह रामभाऊ म्हाळगी प्रबोधिनीचे महासंचालक तथा आयआयडीएलचे (IIDL) डीन रवींद्र साठे, आयआयडीएलचे (IIDL) अभ्यासक्रम संचालक तथा रामभाऊ म्हाळगी प्रबोधिनीचे मुख्य शैक्षणिक अधिकारी देवेंद्र पै यांच्यासह प्रबोधिनीचे इतर मान्यवर सदस्य उपस्थित होते.

 

 

आयआयडीएलच्या या अहवालात संस्थेने केलेली वाटचाल, प्रवास, स्थापना, संस्थेत झालेले कार्यक्रम, संस्थेच्या माध्यमातून झालेले अभ्यास दौरे, आयआयडीएलला दिग्गज मान्यवरांनी दिलेल्या भेटी, संस्थेत शिकून उच्च पदावर काम करणाऱ्या विद्यार्थ्यांची माहिती यासह अनेक महत्त्वपूर्ण घटनांचा समावेश करण्यात आला आहे.

 

 

बदलत्या भारतात देशाचे भवितव्य घडवण्यात राजकीय, सामाजिक आणि माध्यमांतील व्यक्तींचा सहभाग अत्यंत महत्त्वाचा आहे. त्यांना प्रशिक्षित आणि सुशिक्षित करण्यासाठी मागील पाच वर्षांपासून म्हाळगी प्रबोधिनीच्या माध्यमातून आयआयडीएल नव्या नेतृत्वाला घडवण्यासाठी प्रयत्न करत आहे. पदवीचे शिक्षण पूर्ण केलेल्या विद्यार्थ्यांसाठी आयआयडीएलमार्फत एक अभ्यासक्रम सुरु करण्यात आला असून त्यात त्यांना राजकारण, प्रशासन आणि जनतेशी संबंधित विषयांवर आपली कारकीर्द घडवण्यासाठी प्रशिक्षण दिले जाते. काही आठवड्यांपूर्वी आयआयडीएलच्या विद्यार्थ्यांचा मलेशिया येथे अभ्यास दौरा आयोजित करण्यात आला होता.