पावसामुळे मुंबईत सोसायटीजवळील जमीन खचली

मुंबई : गेल्या दोन दिवसांपासून सुरु असलेल्या मुसळधार पावसामुळे मुंबईतील वडाळा येथे जमीन खचल्याची घटना घडली आहे. विशेष म्हणजे एका रहिवाशी सोसायटीच्या मागेच ही घटना घडली असून यामुळे सोसायटीमध्ये राहत असलेल्या नागरिकांच्या जीवाला धोका निर्माण झाला आहे.

वडाळा येथे असलेल्या 'लॉएड इस्टेट' या सोसायटीच्या मागे ही दुर्घटना घडली आहे. लॉएड इस्टेटच्या मागील रस्त्यावर रस्त्याजवळ 'दोस्ती अपार्टमेंट' या नव्या इमारतीचे बांधकाम सुरु होते. काल दिवसभर सुरु असलेल्या मुसळधार पावसानंतर या दोन्ही इमारतींमधील रस्ता अचानक खचला. यावेळी या रस्त्यावर पार्क करण्यात आलेल्या काही चारचाकी गाड्या देखील खचलेल्या जमिनीसह खाली गेल्या. यामुळे दोस्ती अपार्टमेंटची कंपाऊंड वॉल देखील तुटली तसेच गाड्यांचे देखील नुकसान झाले.

दरम्यान लॉएड इस्टेटच्या अगदी जवळच ही घटना घडल्यामुळे सोसायटीमध्ये राहत असलेल्या नागरिकांच्या जीवाला धोका निर्माण झाला आहे. दोस्ती अपार्टमेंटच्या बांधकामामुळेच ही घटना घडल्याचा आरोप लॉएड इस्टेटमधील नागरिकांनी केला आहे. तसेच स्थानिक प्रशासनाने देखील या घटनेची गांभीर्याने दखल घेऊन यावर उपाय करण्यास सुरुवात केली आहे.