स्किल इंडिया साठी ८ हजार ८०० कोटींची तरतूद- केंद्रीय मंत्री अश्विनी वैष्णव

याबाबत माहिती देताना केंद्रीय मंत्री अश्विनी वैष्णव म्हणाले की यामध्ये स्किल इंडिया कार्यक्रमासाठी ८ हजार ८०० कोटी रुपये मंजूर करण्यात आले आहेत. याशिवाय राष्ट्रीय सफाई कर्मचारी आयोगाचा कार्यकाळ तीन वर्षांसाठी वाढविण्यात आला आहे.

 

“पंतप्रधान नरेंद्र मोदी यांच्या अध्यक्षतेखाली झालेल्या केंद्रीय मंत्रिमंडळाच्या बैठकीत अनेक निर्णय घेण्यात आले. यावेळी केंद्रीय मंत्री अश्विनी वैष्णव यांनी २०२२-२३ ते २०२५-२६ या कालावधीसाठी ८ हजार, ८०० कोटी रुपयांच्या खर्चासह २०२६ पर्यंत ‘स्किल इंडिया’ प्रोग्राम सुरू ठेवण्यास आणि पुनर्रचना करण्यास मंत्रिमंडळाने मान्यता दिली आहे. यामुळे देशभरातील भविष्यासाठी तयार कुशल, मागणी-आधारित, तांत्रिकदृष्ट्या सक्षम आणि औद्योगिकदृष्ट्या प्रशिक्षित तरुण तयार होतील,” असा विश्वास त्यांनी व्यक्त केला. “या योजनेअंतर्गत ‘प्रधानमंत्री कौशल्य विकास योजना ४.०’ (पीएमकेव्हीवाय ४.०), ‘प्रधानमंत्री राष्ट्रीय अप्रेंटिसशिप प्रमोशन योजना’ (पीएम-एनएपीएस) आणि ‘जनशिक्षण संस्थान’ (जेएसएस) योजना विलीन करण्यात आल्या आहेत. आता या तिन्ही योजना ‘स्किल इंडिया’ कार्यक्रमाचा एक भाग असतील,” असे केंद्रीय मंत्री अश्विनी वैष्णव सांगितले.