नोकरभरतीला ब्रेक?

महापालिकेत होणार्‍या नोकरभरतीसाठी नाशिक पालिका प्रशासनाने ’टीसीएस’ कंपनीशी करार केला आहे. गेल्या महिन्यात मनपाने शासनाकडे नोकरभरतीचा प्रस्ताव मंजुरीसाठी पाठवलेला असून, त्यास अद्याप मंजुरी मिळालेली नसल्याचे चित्र आहे. दरम्यान, मार्च महिन्याच्या पहिल्या आठवड्यात लोकसभा निवडणुकीची आचारसंहिता लागण्याची शक्यता आहे. त्यामुळे नोकरभरतीची प्रक्रिया पूर्ण न झाल्यास आरोग्य व अग्निशमनच्या प्रस्तावित ५८६ पदांसाठीच्या भरतीला ब्रेक बसण्याची चिन्हे आहे. दरम्यान, लोकसभेनंतर लगेचच विधानसभा निवडणुकीचे वारे वाहणार असल्याने, या सर्व घडामोडींचा फटका नोकरभरतीला बसून थेट पुढच्या वर्षीच भरतीला मुहूर्त लागण्याची शक्यता आहे. महापालिकेत २४ वर्षांपासून नोकरभरती झालेली नाही. एकीकडे अपुर्‍यामनुष्यबळामुळे दैनंदिन कामावर प्रचंड ताण पडत असताना, विविध विभागांतील कर्मचारी-अधिकार्‍यांची सेवानिवृत्त होणार्‍यांची संख्या वाढत आहे. यामुळे महापालिकेचाच कणा दिवसेंदिवस वाकत आहे. माजी महापौर सतीश कुलकर्णी यांनी विशेष महासभा बोलावत, नोकरभरतीला मंजुरी दिली होती. त्यानंतर प्रशासकीय राजवट आल्यानंतर, भरतीसाठी प्रयत्न सुरू झाले. परंतु, मागे चार ते पाच महिने महापालिकेला पूर्णवेळ आयुक्तच नसल्याचे भरतीला याचा फटका बसला. ’टीसीएस’ कंपनीशी करार होऊन वर्ष होत आहे. परंतु, या कंपनीकडे राज्यातील इतर महापालिकांतील भरतीची जबाबदारी असल्याने, मनपातील भरती प्रक्रिया संथगतीने सुरू आहे. मंजूर २ हजार, ७०० पदांपैकी आरोग्य व अग्निशमन विभागातील ५८६ पदे प्राधान्य देऊन भरली जाणार आहेत. गेल्या वर्षीच्या डिसेंबरमध्ये नोकरभरतीची प्रक्रिया पूर्ण होणे आवश्यक होते. मात्र, फेब्रुवारी संपण्यात आला असल्याने, अद्याप नोकरभरतीला चाल मिळत नसल्याचे चित्र आहे. यामुळे भरती प्रक्रिया लोकसभेच्या कचाट्यात सापडण्याची शक्यता वर्तवली जात आहे. ‘कोरोना’काळात आस्थापना खर्च खाली आल्याने, नोकरभरतीच्या अपेक्षा उंचावल्या. नंतर आस्थापना खर्च चाळीशी पार गेला. परंतु, राज्य शासनाने आरोग्य व अग्निशमन या दोन विभागांसाठी आस्थापनाची अट रद्द केली. सध्या पालिकेत मनुष्यबळाची मोठी आवश्यकता असली, तरी प्रशासनाकडून त्यास चाल देण्याची आवश्यकता आहे. ‘टीसीएस’ कंपनीला नोकरभरतीचे काम दिले आहे. परंतु, या प्रक्रियेला वेग मिळत नसल्याचे चित्र आहे.