खदिजाची मानसिकता!

खदिजा कुठे राहते? तर भारतातल्या महाराष्ट्रातल्या पुण्यामध्ये. तिचे पूर्वज अरबस्थानातले मूळचे मुस्लीम आहेत का? नक्कीच नाही. तिच्या मागच्या आणि पुढच्या पिढ्याही भारतात उपलब्ध असलेल्या सगळ्या सुविधा घेत, भारताच्या मातीतच जन्मल्या आणि जन्मणार आणि मरणारही. थोडक्यात, भारतातच राहून भारताचेच खाणारी आणि भारतविरोधी असणारी खदिजा. तिने म्हणे तिचे भारतविरोधी ‘ट्विट’ दोन तासांत डिलीट केले. ‘ट्विट’ डिलीट करता येतात. पण, मन आणि बुद्धीच जर नासकी असेल, तर ती डिलीट करता येते का? खदिजा शेखची पाकिस्तानप्रेमी मानसिकता आणि संस्कार डिलीट झाले का?

आता विचार करायची ‘पाळी’

गायत्री कोळी या २६ वर्षांच्या महिलेचा खून तिच्या सासरच्यांनी केला. कारण, मासिक पाळी आली असताना तिने स्वयंपाक केला. ही घटना कधीची तर गेल्या महिन्यातील. तीसुद्धा जळगावची. ‘मासिक पाळी’ हा शब्द जरी उच्चारला तरी समाज काय विचार करतो? लैंगिक विषयावर बोलणे टाळले जाते, तसेच मासिक पाळीबद्दलही बोलणे टाळले जाते. स्त्रियांच्या धैर्याची आणि सहनशीलतेची परीक्षा घेणारे आणि साक्ष देणारे मासिक चक्र. मात्र, अनादि काळापासून स्त्रीशक्तीने मासिकधर्माच्या वेळी होणार्या कधी थोड्या, तर कधी जास्तच होणार्या त्रासावर मात केली. त्यामुळे तिच्या पाळीबद्दल बोलायलाच हवे. काही प्रातिनिधीक घटना पाहू. शाळेत असताना मासिक पाळी आली आणि कपड्याला डाग लागले, तर भीतीने किंवा लाजेने आजही अनेक विद्यार्थिनी शाळा सोडतात. मासिक पाळी आली असेल आणि शाळा-महाविद्यालयात जर शौचालयाची व्यवस्था नसेल किंवा अत्यंत अस्वच्छ गैरसोईचे शौचालय असेल, तरीसुद्धा अनेक विद्यार्थिनी शाळा, महाविद्यालये सोडतात. अनेक ठिकाणी महिलांना देवघर, स्वयंपाक वगैरे यांना हात लावू दिला जात नाही. (अपवाद क्षमस्व) हे सगळे योग्य नाही. सगळ्या सृष्टीसह मासिक पाळीसुद्धा तर देवाची निर्मिती आहे. देवाने दिलेल्या गोष्टीचा देवाला विटाळ का होईल? मात्र, आणखी एक बाजू आहे. मासिक पाळीच्या दिवसात हिंदू समाजच महिलांशी कसे अमानवीय वागतो, असे सांगून हिंदू महिला-मुलींना समाजाविरोधात चिथावणार्या काही समाजविघातक शक्तीही सक्रिय आहेत. या लोकांच्या म्हणण्याप्रमाणे, खरंच का पूर्वीपासून आपल्या समाजात मासिक पाळी आल्यावर महिलांना बहिष्कृततेची वागणूक दिली जायची? खरंच का हिंदू समाज महिलांविरोधी आहे? अर्थात तसे नाही. हिंदू समाज हा परिवर्तनशील, सृजनशील आहे. जे जे उदात्त आहे, त्याचा स्वीकार आणि जे समाजविघातक आहे, त्याचा त्याग करणे हे समाजाचे वैशिष्ट्य आहे. त्यामुळे मासिक पाळी संदर्भात समाजात प्रथा, परंपरा, रूढी कशा आल्या, याचा मागोवा घेणे गरजेचे आहे. तसेच, मासिक पाळीबाबतच्या कालबाह्य रूढी तसेच, गैरसमजही आपण मनातून आणि कृतीतून दूर करूया.