‘पीडीपी’चा पराभव

दिल्लीकरांना रेवडीवाटपाची सवय लावणार्‍या रेवडीबाज आम आदमी पक्षाला हरियाणाच्या निवडणुकीत मानहानीकारक पराभवास सामोरे जावे लागले. हरियाणामध्ये लढवलेल्या ८९ जागांपैकी एकाही जागेवर ‘आप’ला विजय मिळवता आलेला नाही. अरविंद केजरीवाल यांच्या ‘भ्रष्ट राजकारणी’ म्हणून निर्माण झालेल्या प्रतिमेची सर्वात मोठी झळ ‘आप’ला हरियाणामध्ये बसली. लोकसभा निवडणुकीत ‘इंडी’ आघाडीचा घटक असलेल्या ‘आप’ने हरियाणा निवडणूक स्वबळावर लढवण्याचा नारा दिला होता. त्यासाठी त्यांनी काँग्रेस पक्षाशी फारकात घेतली होती. मद्य घोटाळ्याच्या आरोपात जामिनावर बाहेर आलेल्या केजरीवालांनी दिल्लीचे मुख्यमंत्रिपद त्यागत ते आतिशी मार्लेना यांच्या गळ्यात मारले. त्यामुळे हरियाणाच्या प्रचारासाठी ते मुक्त होते. हरियाणाच्या बाजूला असलेल्या पंजाब या राज्यामध्ये सध्या ‘आप’चे सरकार असून, त्यांच्या शासनकाळात तेथील सुरक्षा आणि शासनव्यवस्था हा कायमच टीकेचा विषय राहिला आहे. पंजाबबरोबर हरियाणामध्ये सत्ता आल्यास तिकडे मुख्यमंत्री म्हणून बसण्याची स्वप्नेदेखील केजरीवालांना मध्यंतरी पडल्याची चर्चा राजकीय वर्तुळात रंगली होती. मात्र, या चर्चांना मूर्त स्वरूप न देण्याची जबाबदारी हरियाणाच्या जनतेने उत्तम निभावली. त्यामुळे अरविंद केजरीवाल यांची जन्मभूमी असलेल्या हरियाणानेच त्यांच्या रेवडीवाटप संस्कृतीला नाकारल्याचे स्पष्ट झाले आहे, तर, हरियाणामध्ये जरी मानहानिकारक पराभव झाला असला तरी, जम्मू आणि काश्मीरमध्ये ‘आप’ने खाते उघडले असून, चंचूप्रवेश केला आहे. डोडा मतदारसंघात मेहराज मलिक या ‘आप’च्या उमेदवाराने भाजपच्या गजय राणा यांचा ४ हजार, ५३८ मतांनी पराभव केला. बहुपक्षीय लढतीचा मोठा फायदा या मतदारसंघात ‘आप’ला झालेला दिसतो. पंजाब राज्यात आज वाढणार्‍या पाकिस्तानपुरस्कृत अमली पदार्थांच्या वापरावर नियंत्रण आणणे, ‘आप’ला अजूनही जमलेले नाही. तसेच, राज्यात ‘आप’ची सत्ता असतानाच, लोकसभेत खलिस्तानी समर्थक तुरुंगात बसून निवडणूक लढवत खासदार झाला आहे, याकडे डोळेझाक करता येणार नाही. त्यामुळे ‘आप’सारख्या पक्षाचा चंचूप्रवेश जम्मू-काश्मीर सारख्या संवेदनशील सीमावर्ती राज्यांमध्ये होणे, ही देशाच्या द़ृष्टीने चिंतेचीच बाब म्हणावी लागेल.

कौस्तुभ वीरकर