ठाकरे गटाच्या सुनील प्रभूंनी बदलली साक्ष

 

बुधवारी, दि. २९ नोव्हेंबर रोजी १२.३० वाजता शिवसेना आमदार अपात्रता याचिकांवर विधानसभा अध्यक्षांसमोर सुनावणीला सुरुवात झाली. यावेळी पुन्हा एकदा शिंदे गटाच्या वकिलांनी सुनील प्रभू यांची उलटतपासणी घेतली. २२ जून २०२२ रोजी आपण जे पत्र एकनाथ शिंदे यांना पाठवले, ते कोणत्या माध्यमातून पाठवले, असा सवाल शिंदेंचे वकील महेश जेठमलानी यांनी केला. त्यावर 'व्हॉट्सएपच्या माध्यमातून', असे उत्तर प्रभूंनी दिले.

त्यावर या पत्राची मूळ प्रत कुठे आहे, असा प्रतिप्रश्न करण्यात आला. मूळ प्रत रेकॉर्डवर आहे, असे प्रभूंनी सांगितले. मात्र, एकनाथ शिंदे यांना अशी कोणतीही मूळ प्रत पाठवण्यात आली नसल्याचा दावा जेठमलानी यांनी केला. हा दावा खोटा असल्यास व्हॉट्सएपद्वारे पत्र पाठवल्याचे पुरावे सादर करा, असे जेठमलानी म्हणाले.त्यावर गांगरून गेलेल्या प्रभूंनी दुसऱ्या सत्रात आपली साक्ष बदलण्याची विनंती केली. जेवणाच्या सुटीमध्ये मी पडताळणी केल्यानंतर हे पत्र ईमेलद्वारे पाठवल्याचे आढळले. त्यामुळे माझी साक्ष बदलण्यात यावी, असे प्रभू म्हणाले. त्यावर विधानसभा अध्यक्ष राहुल नार्वेकर यांनी त्यांना तशी परवानगी दिली.

१ डिसेंबरपासून ठाकरेंच्या वकिलांना संधी

सध्याच्या वेळापत्रकानुसार ३० नोव्हेंबरपर्यंत शिंदे गटाच्या वकिलांना ठाकरे गटाची उलटसाक्ष घेता येईल. त्यानंतर १ ते ११ डिसेंबरपर्यंत ठाकरे गटाचे वकील शिंदे गटाची उलटसाक्ष घेतील. सर्वोच्च न्यायालयाने विधानसभा अध्यक्षांना ३१ डिसेंबरपर्यंत अंतिम निर्णय घेण्याचे निर्देश दिले आहेत. मात्र, दोन्ही बाजूंचे युक्तिवाद संपल्यावर निकाल देण्यास २० ते २५ दिवसांचा कालावधी लागण्याची शक्यता आहे. त्यामुळे विधानसभा सचिवालयाकडून सर्वोच्च न्यायालयाला वेळ वाढवून देण्याची विनंती केली जाणार आहे.