सावधान... ऑक्टोबर हिटमुळे उष्माघाताचा धोका; तापमान ३२ ते ३६ अंश सेल्सिअसपर्यत

ठाणे : सप्टेंबर महिन्यात धुवाँधार बरसात केल्यानंतर परतीच्या पावसाने ऑक्टोबर महिन्यात दडी मारली. परिणामी, उन्हाचा पारा चढला असुन हवेत आद्रता असल्याने ठाणेकरांच्या अंगाची लाहीलाही होत आहे. तापमानाचा पारा दिवसेंदिवस चढताच राहिला असुन गेले काही दिवस तापमान ३२ ते ३६ अंश सेल्सिअसपर्यत पोहचले आहे. सोमवारी ठाण्यात ३५.०६ अंश सेल्सिअस इतक्या कमाल तापमानाची नोंद झाली. तेव्हा, कडाक्याच्या उन्हामुळे उष्माघाताचा (हीटस्ट्रोक) धोका वाढला आहे.

पावसाने उसंत घेतल्यानंतर गेल्या काही दिवसांपासून ठाणे जिल्ह्यातील तापमानात वाढ होताना दिसून येत आहे. मागील सहा दिवसांपासून तापमानात मोठी वाढ होऊन ठाणे शहराचे तापमान पस्तीशी पार पोहचल्याची नोंद ठाणे महापालिकेच्या पर्यावरण विभागाने केली आहे. एल निनो मुळे यंदा तापमानात वाढ होण्याची शक्यता असुन २०२४ च्या पहिल्या तिमाहीपर्यंत उन्हाचा ज्वर कायम राहण्याची शक्यता आहे, या वर्षी डिसेंबरच्या आसपास तापमानाचा उच्चांक अपेक्षित आहे, अशी शक्यता हवामान विभागाकडून शक्यता वर्तवण्यात येत आहे. तर शहरातील नैसर्गिक संपदेला हानी पोहचल्याने तसेच बहुतांश रस्ते सिमेंट-कॉंक्रीटचे बनल्याने मातीशी संपर्क तुटला आहे. त्यामुळे गेल्या काही वर्षात तापमानात सातत्याने वाढ होत असल्याचे मत पर्यावरण तज्ञ व्यक्त करत आहेत.