विद्यार्थी वसतीगृहात जेवत होते अन् अचानक विमान आत शिरलं! अहमदाबादमधील दुर्घटनेत काय घडलं?

गांधीनगर : अहमदाबाद येथे झालेल्या प्रवासी विमान अपघाताच्या घटनेनेने संपूर्ण देश हादरला आहे. दरम्यान, हे विमान अहमदाबादमधील एका वसतीगृहावर कोसळले असून यात वसतीगृहाचे मोठे नुकसान झाले आहे. तसेच या अपघातात वसतीगृहातील अनेक विद्यार्थ्यांचा मृत्यू झाल्याचीही प्राथमिक माहिती पुढे आली आहे.

गुरुवारी अहमदाबादहून लंडनला जाणारे एअर इंडियाचे AI-१७१ विमान कोसळून मोठा अपघात घडला. या विमानात एकूण २४२ प्रवासी असून अपघातातील मृतांचा आकडा अद्याप पुढे आलेला नाही. दरम्यान, या दुर्घटनेनंतर घटनास्थळी बचाकार्याला वेग आला आहे.

मिळालेल्या माहितीनुसार, अहमदाबादमधील बी. जे. मेडिकल कॉलेजच्या वसतीगृहावर हे विमान कोसळले. दुपारी दीड वाजताच्या सुमारास विद्यार्थ्यांना जेवणाची सुट्टी झाली असून सगळे विद्यार्थी जेवत होते. याचवेळी अचानक हे विमान कोसळल्याने मोठे नुकसान झाले आहे. यात २० हून अधिक विद्यार्थ्यांच्या मृत्यू झाल्याची शक्यता वर्तवण्यात येत आहे. तसेच इथले अनेक डॉक्टर्स जखमी झाल्याचीही माहिती पुढे आली आहे.

एअर इंडियाचे हे विमान वसतीगृहावर कोसळल्याचे अनेक फोटो आणि व्हिडीओ सोशल मीडियावर व्हायरल झाले असून यावरून हा अपघात किती भीषण होता याची कल्पना येते. दरम्यान, बी. जे. मेडिकल कॉलेजच्या वसतीगृहावरदेखील बचावकार्य सुरु करण्यात आले आहे.