'विरप्पन' अजूनही जिवंतच ! माणसातला दानवी चेहरा उघड

    दिनांक  03-Jun-2020 19:56:22
|
Kerala _1  H x





आपल्याला जणू देवाने पृथ्वी काबीज करण्यासाठीच पाठवले आहे, आपण इथले सर्वश्रेष्ठ प्राणी आहोत, असा भ्रम मनुष्याला ज्या दिवशी झाला तेव्हाच खरंतरं त्याच्या विनाशाची सुरुवात झाली... पोलीस अधिकाऱ्यांना हस्तीदंतांसाठी आणि चंदन तस्करीसाठी वाटेल त्या थराला जाणाऱ्या 'विरप्पन'ला तर कंठस्नान घातले मात्र, त्यांची वृत्ती संपवू शकले नाहीत. केरळमध्ये गर्भार हत्तीणीच्या तोंडी फटाक्यांनी भरलेले अननस देण्याच्या घटनेनंतर मनुष्याचा दानवरुपी चेहरा पुन्हा उघड झाला. 



अंदाजे १४-१५ वर्षांची गर्भार हत्तीण... पलक्कडमधल्या सायलेंट व्हॅली नॅशनल पार्कच्या परिसरातून रस्ता भरकटली. पोटातल्या गोळ्याला लागलेली भूक शमवण्यासाठी तिने वणवण सुरू केली होती. गावातून बाहेर पडली मात्र, कुणालाही इजा न करता किंवा त्रास न देता. कुणीतरी तिला डिवचण्याच्या आणि असूरी आनंद घेण्याच्या नादात तिला फटाके भरलेले अननस खाऊ घातले. भूकेने व्याकुळ झालेल्या त्या जीवाने समोरच्या व्यक्तीला मनोमन आशीर्वाद देत अननस दाढेखाली दाबला आणि फटाक्यांचा स्फोट झाला. संपूर्ण जबडा भाजला.




वेदना असह्य झाल्याने ती जवळच्या वेलियार नदीत उभी होती. सतत तीन दिवस त्याच तशीच अहोरात्र उभी राहीली. दातही तुटले. वेदना असह्य होत होत्या. वनाधिकारी तिच्यापर्यंत नदीत पोहोचू शकले नाहीत. तिला बाहेर काढण्यासाठी दोन प्रशिक्षित हत्ती पाचारण करण्यात आले पण ती जागचीच हलली नाही. शस्त्रक्रीया करण्यापूर्वी तिने प्राण सोडले. वनाधिकारी आणि डॉक्टरांना जखमा झाल्याची जागा सापडू शकली नाही. 


शवविच्छेदनात ती गर्भार असल्याचे समजले. ही बाब समजल्यावर डॉक्टरांनाही त्यांचे अश्रू अनावर झाले होते. तिच्यावर अंत्यसंस्कार करण्यात आले, अंत्यसंस्कारावेळी डॉक्टर आणि वनाधिकारी मोहन कृष्णन यांनी तिला वाकून नमस्कार करत श्रद्धांजली वाहिली. कृष्णन यांनी फेसबूकवर भावूक पोस्ट लिहीली. देशभरातून याबद्दल संतापाची भावना व्यक्त करण्यात येत आहे. दरम्यान, या प्रकरणी अज्ञातांविरोधात गुन्हा दाखल करण्यात आला. इथल्या भागांमध्ये असा मानव-प्राणी संघर्ष सुरूच आहेत. हिंदू संस्कृतीत जिथे प्राण्यांना देव मानण्याची परंपरा आहे, निसर्ग ही सर्वातमोठी शक्ती मानण्याची पद्धती आहे. तिथल्याच देवभूमी केरळमध्ये असल्या घटनांनी मानवतेवर प्रश्नचिन्ह उभे केले आहे. 



आता महाMTBच्या बातम्या आणि लेख मिळवा एका क्लिकवर. Facebook, Twitter, Helo वर आम्हाला फॉलो करा, महाMTB You tube चॅनलला सबस्क्राईब करा. डाऊनलोड करा महाMTB App.