परदेशी वन्यजीवांच्या तस्करीचे सत्र सुरूच; मुंबई विमानतळावरुन ८ वन्यजीव ताब्यात

मुंबई (विशेष प्रतिनिधी) - मुंबईच्या छत्रपती शिवाजी महाराज विमानतळावरुन शुक्रवार दि. ११ जुलै रोजी आठ परदेशी वन्यजीवांची तस्करी उघडकीस आली (exotic wildlife seized). बॅंकाॅकमधून आलेल्या या वन्यजीवांना पुन्हा आलेल्या देशात पाठवण्यात आले आहे (exotic wildlife seized). गेल्या महिन्याभरात मुंबई विमानतळावरुन पकडलेले हे परदेशी वन्यजीव तस्करीचे हे सातवे प्रकरण असून यामाध्यमातून ३७२ वन्यजीवांना ताब्यात घेण्यात आले आहे. (exotic wildlife seized)

 

 

११ जुलै रोजी बॅंकाकवरुन एअर इंडिया आणि थाय व्हिएतजेटचे विमान मुंबई आंतरराष्ट्रीय विमानतळावर उतरले. या विमानांमधून प्रवास करणाऱ्या दोन वेगवेगळ्या भारतीय प्रवाशांच्या सामानात सीमा शुल्क विभागाच्या अधिकाऱ्यांना प्राणी आढळून आले. त्यांच्या सामानाची तपासणी केला असता दोन्ही प्रकरणांमधून एकूण ८ परदेशी वन्यजीव ताब्यात घेण्यात आले. ज्यामधील दोन प्राणी हे मृत होते. या कारवाईमधून ३ मीरकॅट्स (१ मृत), २ ग्रेट बिल्ड पोपट (१ मृत) , २ सुमात्रा स्टाइप्ट ससे आणि १ इंडो चायनीज बाॅक्स टर्टल ताब्यात घेण्यात आले. 'रेस्किंक असोसिएशन फॉर वाइल्डलाइफ वेल्फेअर' (राॅ) या संस्थेने काही काळ या वन्यजीवांची काळजी घेतली. त्यानंतर त्यांना पुन्हा बॅंकाॅकला पाठविण्यात आले.

 

 

'कनव्हेन्शन आॅन इंटरनॅशनल ट्रेड इन एनडेन्जर्ड स्पिसीज आॅफ वाईल्ड फौना अॅण्ड फ्लोरा' म्हणजेच 'सायटीस' या वन्यजीव संरक्षणासाठी असलेल्या आंतरराष्ट्रीय नियमनाअंतर्गत तस्करी होणाऱ्या परदेशी वन्यजीवांना संरक्षण देण्यात आले आहे. या नियमानाअंतर्गत समाविष्ट असणाऱ्या प्राण्यांना भारतीय वन्यजीव संरक्षण कायद्याअंतर्गत चौथ्या श्रेणीत संरक्षण देण्यात आले आहे. म्हणजेच त्यांची वाहतूक करणे वा खरेदी-विक्री करणे कायद्याने गुन्हा आहे.

 

 

- दि. ११ जुलै बॅंकाॅवरुन आलेल्या विमानातून आठ परदेशी वन्यजीवांची तस्करी.

 

- दि. ५ जुलै रोजी थाललॅण्डवरुन थाय एअरवे कंपनीच्या विमानातून मुंबईत आलेल्या परदेशी व्यक्तीच्या सामानात ४५ परदेशी वन्यजीव सापडले. त्यामध्ये रॅकून, हायरॅक्स, ब्लॅक फॉक्स स्क्विरल, इगुआना असे विदेशी प्राणी होते. त्यामधील एक रॅकून आणि २२ इगुआना वगळता इतर सगळे वन्यजीव मृत पावले होते. यामधील जिवंत प्राण्यांना पुन्हा थायलॅण्डला पाठविण्यात आले.

 

- दि. २८ जून रोजी बॅंकाॅकवरुन इंडिगो कंपनीच्या विमानाने मुंबईत आलेल्या व्यक्तीच्या सामानात १६ जीवंत साप आढळले. यामध्ये केनियन सॅण्ड बोवा, रायनोसाॅरस रॅट स्नेक, अल्बिनो होंडुरन मिल्क स्नेक, होंडुरन मिल्क स्नेक, कोस्टल बॅंडेड कॅलिफोर्नियन किंग स्नेक या प्रजातीचे साप होते. इंडिगो कंपनीकडे वन्यजीव पुन्हा आलेल्या देशात पाठवण्याची परवानगी नसल्याने त्यांना 'डब्लूसीसीबी'कडे सोपविण्यात आले. त्यानंतर त्यांना 'वनतारा'मध्ये हलविण्यात आले.

 

- दि. २५ जून रोजी बॅंकाॅकवरुन एअर इंडियाच्या विमानाने मुंबई विमानतळावर उतरलेल्या मुंबईचे रहिवासी असलेल्या दोन प्रवशांकडे १२० परदेशी वन्यजीव आढळले. यामध्ये तपकिरी बॅसिलिस्क सरडा, इगुआना, सुमात्रान पट्टेदार ससा आणि कुस्कस या वन्यजीवांचा समावेश होता. कस्टम आणि डब्लूसीसीबी मार्फत त्यांना पुन्हा परतीच्या विमानाने पुन्हा बॅंकाॅकला पाठविण्यात आले.

 

- दि. ९ जून रोजी बॅंकाॅकवरुन मुंबई विमानतळावर उतरलेल्या व्यक्तीच्या ९५ परदेशी वन्यजीव सापडले. व्यक्तींवर गुन्हा दाखल करुन या सगळ्या वन्यजीवांना पुन्हा बॅंकाॅकमध्ये पाठविण्यात आले.

 

- दि. ३१ मे रोजी बॅंकाॅकमधून आलेल्या व्यक्तीच्या सामानात तीन स्पायडर-टेल्ड हाॅर्न व्हायपर, पाच एशियन लीफ टर्टल आणि ४४ इंडोनेशियन पीट व्हायपर असे एकूण ५२ वन्यजीव सापडले. या वन्यजीवांना पुन्हा बॅंकाॅकला पाठविण्यात आले.

 

- दि. ८ मे रोजी बॅंकाॅकमधून आलेल्या व्यक्तीकडे ३६ वन्यजीव सापडले. त्यामधील २८ जीवंत, तर आठ वन्यजीव मृत होते.