असा खेळाडू होणे नाही!

चुनी यांचा जन्म १५ जानेवरी १९३८ रोजी पश्मिम बंगालमधील किशोरगंज येथे झाला. आता हे गाव बांगलादेशमध्ये आहे. कालांतराने गोस्वामी कुटुंब किशोरगंज येथून दक्षिण कोलकात्यातील जोधपूर पार्क येथे स्थलांतरित झाले. उच्चमध्यमवर्गीय कुटुंबात जन्मलेले चुनी यांना लहानपणापासूनच विविध क्रीडा प्रकारांत रस होता. आधीपासूनच ते मुलांसोबत अनेक विविध खेळ खेळण्यास मैदानावर जात असे. विविध प्रकारचे खेळ खेळणे, हीच आवड त्यांच्या आयुष्याचा भाग बनली आणि फुटबॉलमध्ये करिअर करण्याचा त्यांनी निर्णय घेतला. १९४६ साली ते वयाच्या आठव्या वर्षी मोहन बागानच्या कनिष्ठ फुटबॉल संघात दाखल झाले. येथे जवळपास २२ वर्षे ते खेळत राहिले. चुनी यांनी १९५६ मध्ये आंतरराष्ट्रीय फुटबॉलमध्ये पदार्पण केले. या सामन्यात भारताने चीनच्या ऑलिम्पिक संघाला ‘१-०’ असे नामोहरम केले. १९६० ते १९६४ या पाच हंगामांमध्ये त्यांनी फुटबॉल संघाचे नेतृत्वही केले. मोहन बागानच्या सुवर्णकाळात ३१ जेतेपदे संघाने जिंकली होती. यात चुनी यांचा मोलाचा वाटा होता. कारण, या काळात त्यांच्या नावावर तब्बल २०० गोलची नोंद झाली होती. एका खेळाडूच्या नावावर इतक्या मोठ्या प्रमाणात गोलची असणारी नोंद पाहून त्यावेळी ‘इंग्लिश प्रिमीअर लीग’मधील अनेक नामांकित क्लब्सनी त्यांच्यापुढे खेळण्याचे प्रस्ताव ठेवले; परंतु चुनी यांनी ते नाकारले. लीगमधून खेळण्याऐवजी भारतीय संघाकडूनच खेळण्याचा निर्णय त्यांनी घेतला. परदेशी लीग स्पर्धांमध्ये सहभागी झाल्यास त्यांना सहज पैसेही कमावता आले असते. मात्र, स्वतःचे आर्थिक हित साधण्याऐवजी त्यांनी देशासाठी खेळण्याला प्राधान्य दिले. त्यांनी ऑलिम्पिक, आशियाई क्रीडा स्पर्धा, आशिया चषक आदी स्पर्धांमधील ५० सामन्यांमध्ये भारतीय संघाचे नेतृत्व केले. १९६२च्या यशानंतर १९६४च्या आशिया चषक आणि मेर्डेका चषक स्पर्धेत भारताला त्यांनी रुपेरी यश मिळवून दिले.