मोहरमच्या मिरवणुकीत पॅलेस्टिनी झेंडे; गाझाच्या समर्थनार्थ घोषणाबाजी

 

 

श्रीनगर : जम्मू आणि काश्मीर प्रशासनाने धार्मिक मिरवणुकीला परवानगी दिल्यानंतर हजारो शिया मुस्लिमांनी श्रीनगरमध्ये मोहरम मिरवणूक काढली. मोहरमच्या मिरवणुकीदरम्यान, पॅलेस्टिनी झेंडे फडकावले आणि गाझाच्या समर्थनार्थ घोषणा दिल्या. शिवाय, मिरवणूक सुरळीतपणे आणि कोणतीही अप्रिय घटना घडू नये यासाठी प्रशासनाने मिरवणुकीवर अनेक अटी घातल्यानंतरही त्यांनी अमेरिका आणि इस्रायलविरोधी घोषणा दिल्या.

 

विशेष म्हणजे प्रशासनाने सलग दुसऱ्या वर्षी धार्मिक मिरवणुकीला परवानगी दिली कारण १९९० च्या दशकापासून श्रीनगरमध्ये मोहरमच्या मिरवणुकांवर बंदी घालण्यात आली होती. गेल्या वर्षी नायब राज्यपाल यांच्या प्रशासनाने मोहरम मिरवणुकीवरील बंदी उठवली होती. सामान्य जनजीवन विस्कळीत होऊ नये यासाठी अधिका-यांनी मोहरम मिरवणुकीसाठी मर्यादित वेळ दिल्याने सोमवार, १५ जुलै रोजी पहाटे ५.३० वाजता हजारो शोककर्ते गुरुबाजार येथे जमले. करण नगर परिसरातील गुरुबाजार येथून ही मिरवणूक सुरू झाली.

 

उल्लेखनीय म्हणजे, श्रीनगरचे जिल्हा दंडाधिकारी बिलाल मोही-उद्दीन भट यांनी मिरवणुकांवर अनेक अटी घातल्या होत्या. जिल्हा अधिकारांच्या आदेशानुसार, सहभागींना राज्याच्या सुरक्षा आणि सार्वभौमत्वाशी तडजोड करू शकणाऱ्या कोणत्याही कृतीत सहभागी न होण्याचे निर्देश देण्यात आले होते. त्यांना चिथावणी देणारे किंवा बंदी घातलेल्या संघटनांशी संलग्न असलेले ध्वज किंवा चिन्हे प्रदर्शित करण्यास देखील मनाई होती. त्यात त्यांना "कोणत्याही देशविरोधी/प्रस्थापनाविरोधी भाषणे/नारेबाजी किंवा प्रचारात भाग घेऊ नका" असे सांगितले होते.

 

प्रशासनाच्या अटी असूनही, सहभागींनी अमेरिका आणि इस्रायलविरोधी घोषणा दिल्या. शोककर्ते पॅलेस्टिनी झेंडे फडकवताना आणि गाझाच्या समर्थनार्थ घोषणाबाजी करतानाही दिसून आले. इस्लामिक कॅलेंडरचा पहिला महिना, मोहरम हा शिया मुस्लिमांसाठी शोकचा काळ आहे कारण ते इमाम हुसैन यांच्या हौतात्म्याची आठवण करतात. ते प्रेषित मुहम्मद यांचे नातू होते आणि ६८० मध्ये करबलाच्या लढाईत मरण पावले होते.