दिल्ली दंगलीचा मुख्य आरोपी उमर खालिदला जामीन नाहीच

 

 

नवी दिल्ली : दिल्ली दंगलीतील मुख्य आरोपी उमर खालिदने सर्वोच्च न्यायालयात दाखल केलेला जामीन अर्ज मागे घेतला आहे. त्याच्या जामिनावर दि. १४ फेब्रुवारी २०२४ बुधवारी सुनावणी होणार होती. खालिदचे वकील कपिल सिब्बल यांनी याला दुजोरा दिला आहे. याचिका मागे घेण्यामागे परिस्थितीतील बदलाचे कारण सांगण्यात आले आहे. आता उमर खालिद कनिष्ठ न्यायालयात जामीन मिळण्याच्या शक्यता तपासणार आहे. मात्र, जिल्हा न्यायालय आणि उच्च न्यायालयात उमर खालिदचे जामीन अर्ज यापूर्वीच फेटाळण्यात आले आहेत.

 

मीडिया रिपोर्ट्सनुसार, उमर खालिदच्या जामीन याचिकेवर दि. १४ फेब्रुवारी २०२४ बुधवारी सुप्रीम कोर्टात सुनावणी होणार होती. न्यायमूर्ती बेला एम त्रिवेदी आणि न्यायमूर्ती पंकज मित्तल यांच्या खंडपीठासमोर ही सुनावणी होणार होती. सुनावणीपूर्वी उमर खालिदचे वकील कपिल सिब्बल यांनी सर्वोच्च न्यायालयात अर्ज दाखल केला आणि याचिका मागे घेण्याचे आवाहन केले. अर्ज मागे घेण्यामागे त्यांनी परिस्थितीतील बदलाचे कारण सांगितले.

 

कपिल सिब्बल यांचा हा अर्ज सर्वोच्च न्यायालयाने मान्य केला आहे. आता कपिल सिब्बल म्हणतात की ते कनिष्ठ न्यायालयांमध्ये उपलब्ध असलेल्या कायदेशीर पर्यायांवर काम करणार आहेत. याआधी उमर खालिदचा जामीन अर्ज दिल्लीच्या करकरडूमा सत्र न्यायालयाने मार्च २०२२ मध्ये फेटाळला होता. या निर्णयाला उमर खालिदने दिल्ली उच्च न्यायालयात आव्हान दिले होते.

 

ऑक्टोबर २०२२ मध्ये दिल्ली उच्च न्यायालयाने उमर खालिदला जामीन देण्यासही नकार दिला होता. तेव्हापासून उमर खालिद जामिनासाठी सर्वोच्च न्यायालयात जाऊ शकतो, असे मानले जात होते. मे २०२३ मध्ये सर्वोच्च न्यायालयाने उमर खालिद प्रकरणी दिल्ली पोलिसांकडून उत्तर मागितले होते. नोव्हेंबर २०२३ मध्ये दोन्ही बाजूंच्या वकीलांच्या अनुपस्थितीमुळे सर्वोच्च न्यायालयात या प्रकरणाची सुनावणी होऊ शकली नाही.