विशेष मतदार नोंदणी मोहीमेसाठी संयुक्त आढावा बैठक संपन्न!

मुंबई : आगामी लोकसभा निवडणूका जाहीर होण्याआधी प्रत्येक मुंबईकराचा मताधिकार सुनिश्चित व्हावा या हेतूनं, मुंबई शहर आणि उपनगर या जिल्ह्यांमध्ये नवमतदार नोंदणी विशेष मोहीम राबवली जात आहे.या मोहिमेला अधिक गती देण्यासाठी मुंबई शहर व मुंबई उपनगर जिल्हा आणि मुंबई महानगरपालिका यांच्या संयुक्त विद्यमाने दि.१३ फेब्रुवारी रोजी ही विशेष मोहिम राबवणार आहे.आज मुंबई महानगरपालिकेमध्ये मुंबई महानगरपालिकेचे आयुक्त इकबालसिंह चहल यांच्या अध्यक्षतेखाली मुंबई शहर जिल्हाधिकारी तथा जिल्हा निवडणूक अधिकारी संजय यादव, बेस्टचे व्यवस्थापकीय संचालक विजय सिंघल, स्वीप नोडल ऑफिसर फरोग मुकादम, विशेष कार्य अधिकारी डॅा. सुभाष दळवी, मुख्य निवडणूक कार्यालय स्वीप समन्वयक, पल्लवी जाधव, मुंबई महानगरपालिकेचे सर्व संबंधित विभागांचे वरिष्ठ अधिकारी यांच्या समवेत आढावा बैठक संपन्न झाली.

बृहन्मुंबई महानगर पालिकेशी संलग्नीत सार्वजनिक आरोग्य विभागाच्या संलग्न आरोग्य सेविका, अशा सेविका, महिला स्वयंसहाय्यता गट, महिला बचत गट, स्वच्छ मुंबई प्रबोधन अभियान वस्ती पातळीवरील कार्यरत संस्था व त्यांचे स्वयंसेवक आणि नागरी सुविधा केंद्रांच्या माध्यमातुन नवमतदार नोदणी विशेष मोहिमेत मुंबई महानगरपालिका सर्वतोपरी सहकार्य करणार असे आश्वासन मुंबई महानगरपालिके आयुक्त डॉ. इकबालसिंह चहल यांनी बैठकीत दिले. तसेच सर्व संबंधितांनी निवडणूकीच्या कामाला अधिक प्राधान्य द्यावे, असे निर्देशही बैठकीत दिले.

जिल्हाधिकारी तथा जिल्हा निवडणूक अधिकारी संजय यादव यांनी मतदार नोंदणी करुन सक्षम लोकशाही मध्ये सहभागी होण्यासाठी आगामी लोकसभा निवडणूकीसाठी मतदार यादीमध्ये नाव नोंदविण्याची संधी अजूनही आहे.असे सांगून मतदार यादीत आपले नाव तपासून घ्यावे, आणि आपले नाव नसेल तर मतदार नोंदणीसाठी voters.eci.gov.in / Voter Helpline Mobile App / मतदार मदत क्रमांक 1800221950 यावर संपर्क करावा असे आवाहनही यावेळी त्यांनी केले.