लडाखमध्ये सैन्य, दारुगोळा आणि रसद पोहोचविणे होणार सोपे

नवी दिल्ली : पूर्व लडाखमध्ये चीनसोबतच्या प्रत्यक्ष नियंत्रण रेषेवर (एलएसी) भारत पायाभूत सुविधांचा वेगवान विकास करत आहे. याच श्रृंखलेत आता बॉर्डर रोड ऑर्गनायझेशन (बीआरओ) लडाखमध्ये दौलत बेग ओल्डीपर्यंत (डिओबी) १३० किमीचा रस्ता बांधत असून हा प्रकल्प आता अंतिम टप्प्यात आहे.

भारत आणि चीन यांच्यातील वाढत्या लष्करी तणावाच्या या रस्त्याच्या कामाला तीन वर्षांपूर्वी गती मिळाली होती. नुब्रा खोऱ्यातील सामोसा ते काराकोरम खिंडीजवळील डिओबीपर्यंतच्या १३० किमी लांबीच्या रस्त्याचे बांधकाम आता अंतिम टप्प्यात पोहोचले आहे. हा अंतिम टप्पा अतिशय आव्हानात्मक असून यामध्ये बीआरओला श्योक या खडकाळ हिमनदी असलेल्या भागात रस्त्यासह पुलाचेही बांधकाम करायचे आहे. त्यासाठी बीआरओ ‘जीओसेल’ या तीन-आयामी पॉलिमरपासून बनविलेले विस्तारित पॅनेलचा वापर करत आहे. याद्वारे रस्ता स्थिर करणे आणि त्याची वहन क्षमता वाढविणे शक्य होणार आहे. नोव्हेंबरपर्यंत हा मार्ग पूर्णपणे तयार होईल, असे बीआरओने सांगितले आहे.