'ISRO'ची अतुलनीय कामगिरी; सिंगापूरच्या सात उपग्रहांचे यशस्वी प्रक्षेपण

श्रीहरीकोटा : भारतीय अंतराळ संशोधन संस्था ‘इस्रो’ची कामगिरी सातत्याने उंचावत असून सिंगापूरच्या सात उपग्रहांचे प्रक्षेपण करुन ‘इस्त्रो’ने आपल्या कामगिरीचा आलेख आणखीनच उंचावला आहे. सिंगापूरच्या ’डीएस-एसएआर’ या उपग्रहासह अन्य सहा उपग्रहांना ‘इस्रो’च्या पीएसएसलव्ही-५6 रॉकेटच्या मदतीने प्रक्षेपित करण्यात आले. पीएसएलव्हीने उड्डाण केल्यानंतर अवघ्या अवघ्या २५ मिनिटांत सर्व उपग्रहांना त्यांच्या कक्षेत पोहोचवण्यात आले. श्रीहरीकोटा येथे असणार्‍या सतीश धवन अवकाश केंद्राच्या पहिल्या लाँच पॅडवरुन हे प्रक्षेपण यशस्वीरित्या झाले आहे. ही एक पूर्णपणे व्यावसायिक मोहीम आहे. न्यूस्पेस इंडिया लिमिटेड ही या मोहिमेचे संचालन करत आहे. ही संस्था अवकाश मंत्रालयाच्या अंतर्गत असल्याची माहिती सुत्रांनी दिली आहे.

‘इस्त्रो’ने केलेल्या या कामगिरीत सर्वात महत्त्वाचा उपग्रह हा सिंगापूरचा डीएसएएसआर हा आहे. सिंगापूर सरकारच्या विज्ञान, संरक्षण आणि तंत्रज्ञान संस्था आणि सिंगापूरमधील एसटी इंजिनिअरिंग यांनी संयुक्तपणे हा उपग्रह विकसित केला असून त्याचा उपयोग व्यावसायिक वापरासाठी असणार आहे.