मनस्वी कलाध्यापक, अष्टपैलू शिल्पकार

‘जे.जे.’मधील अनुभव, ज्ञानाने रमाकांत यांचे कलाविश्व अधिकच बहरले. कलासाधना आणि अर्थाजन असे दोन्ही उद्देश साध्य करण्यासाठी त्यांनी कलेतच पूर्णवेळ करिअर करण्याचे ठरवले. कलानिकेतन महाविद्यालयात ‘ड्रॉईंग अ‍ॅण्ड पेंटिंग’ विषय घेऊन त्यांनी ’जी.डी.आर्ट’चे शिक्षण पूर्ण केले. शिकत असतानाच प्रतिकूल आर्थिक परिस्थितीमुळे त्यांनी महाविद्यालयातील कला इतिहास शिक्षक थत्ते सरांकडे चित्रकलेची कामे करण्यास सुरुवात केली. तिथेच त्यांची ओळख प्रसिद्ध शिल्पकार सुनिल घुले यांच्याशी झाली. आपण कधी शिल्पकार होऊ असे त्यांना कधीच वाटले नाही. चित्रकलेपेक्षा शिल्पकलेत कामे अधिक आहेत, पुतळे, शिल्पाकृतींचे कामे वारंवार सुरु असतात, हे जाणून गायकवाड यांनी शिल्पकला तत्काळ पैसे देईल म्हणून शिकण्यास प्रारंभ केला. घुले सरांनी रमाकांत गायकवाड यांच्या हातातील जादू ओळखत त्यांना शिल्पकलेसाठी आवश्यक ते ज्ञान, कौशल्ये शिकवली. ‘आर्मीएचर’ (पुतळा तयार करण्यापूर्वीचा तारेचा सांगडा) बांधणे, मातीकाम, ‘पीओपी मोल्डिंग’, ‘कास्टिंग’ यासह शिल्पकलेतील बारकावे घुले सरांकडून त्यांनी जलद आत्मसात केले.