नवीन वर्षात विसरु नये असे काही...

2020-2021 या कोरोनादरम्यानच्या सलग दोन वर्षांनंतर नव्याने सुरु झालेल्या 2022 या नववर्षासाठी उद्योग-व्यवसाय नव्याने व नव्या दमाने वाटचाल सुरु करण्याच्या तयारीत असल्याचे चित्र सर्वत्र दिसून येते. व्यवसायवाढीला चालना मिळत असल्याच्या पार्श्वभूमीवर एकीकडे कर्मचारी-कंपन्यांमध्ये विश्वासाचे वातावरण होत असतानाच, काही बाबींकडे विशेष लक्ष देण्याची आवश्यकता असून, नव्या संदर्भांसह नवीन वर्षात व्यवस्थापन आणि व्यवस्थापकांनी खालील मुद्द्यांवर विशेष विचार आणि त्यानुसार कार्य करण्याची आवश्यकता आहे.

बदलती व्यावसायिक परिस्थिती व आव्हानांनुसार काम आणि कामकाज यामधील बदल ही यापुढे आवश्यक बाब ठरणार आहे. सद्यस्थितीत केवळ काम चालू ठेवणे ऐवढेच पुरेसे नव्हे, तर त्याला उत्पादक बनविणेसुद्धा तितकेच आवश्यक ठरले आहे. यासाठी कंपनी आणि कर्मचारी या उभयतांनी लवचिकता बाळगणे तेवढेच आवश्यक ठरते. गरज व आवश्यकतेनुसार कर्मचार्‍यांना धरुन काम करणे, हा पर्याय सर्वांनी पडताळणे व त्याचा अवलंब करणे जरुरी आहे.

व्यवसाय आणि उद्योगात किती व्यापक प्रमाणात अनिश्चितता असू शकते, याचे प्रत्यंतर सरकारपासून ते कंपनी-कर्मचारी, ग्राहक या सर्वांनी नुकतेच व दीर्घकाळापर्यंत घेतले. या क्षेत्रात यासारखी वा याहून अधिक अनिश्चितता येणार नाही, हे निश्चित.

उद्योगजगताने यापूर्वी आर्थिक मंदी, जागतिक स्पर्धा, तंत्रज्ञानविषयक मर्यादा, नोटबंदी, बदलती सरकारे व त्यांची आर्थिक धोरणे, क्वचित येणारी नैसर्गिक संकटे वा औद्योगिक अशांतता इत्यादीमुळे उत्पन्न अस्थिरता पाहिली आहे. या सर्व समस्यांवर यशस्वीपणे मातही केली आहे. मात्र, कोरोना व नंतरच्या अनिश्चिततेचे सुरुवातीपासूनचे आव्हान व स्वरुपच वेगळे होते. आरोग्यामुळे निर्माण झालेल्या या अनिश्चिततेमुळे सर्वांपुढे व्यवसाय-रोजगाराचेच नव्हे, तर अक्षरश: जीवन-मरणाचे संकट उभे ठाकले. यावर पण नवीन वर्षात कृती आणि कारवाई होणे आवश्यक व अपेक्षित आहे.

कोरोनाच्या शिकवणुकीमुळे आपल्या सगळ्यांचाच कस लागला. शासन-प्रशासन, सामाजिक- राजकीय, आर्थिक-औद्योगिक सर्वच क्षेत्रांना यामुळे काही ना शिकायला मिळाले. हे शिक्षण व त्यातून मिळालेली शिकवणूक नव्या वर्षातच नव्हे, तर यापुढे दिशादर्शक ठरणारी आहे. व्यवस्थापन-व्यावसायिकांनी याकडे नवीन वर्षाच्या सुरुवातीपासूनच जागृत व जागरुक राहाणे हे निश्चितपणे सर्वांच्या भल्याचे ठरेल. या नव्या शिक्षणाला यानिमित्ताने आलेल्या अनुभवांची जोड दिल्यास कोरोनाकाळाच्या प्रदीर्घ पार्श्वभूमीवर सुरु होणार्‍या नववर्ष 2022ची सुरुवात व्यावसायिक व वैयक्तिक यशासह होऊ शकेल.