आंबोली-दोडामार्ग काॅन्झर्वेशन रिझर्व्हमध्ये दुर्मीळ 'लाजवंती'चे दर्शन

मुंबई (अक्षय मांडवकर) - सिंधुदुर्ग जिल्ह्यात नुकतेच घोषित झालेल्या 'आंबोली-दोडामार्ग संवर्धन राखीव वनक्षेत्रा'त (काॅन्झर्वेशन रिझर्व्ह) दुर्मीळ 'लाजवंती' म्हणजेच 'स्लेंडर लोरीस' (Slender lorises) प्राण्याचे दर्शन घडले आहे. शनिवारी रात्री स्थानिक निसर्गप्रेमींना हा प्राणी आढळून आला. मात्र, या दुर्मीळ प्राण्याच्या सुरक्षेच्या दृष्टीने 'काॅन्झर्वेशन रिझर्व्ह'मधील त्याचे नेमके स्थान गुप्त ठेवण्यात आले आहे. 

 

 

 

 

'लाजवंती' हा माकड कुळातील एक दुर्मीळ प्राणी आहे. केवळ भारत आणि श्रीलंकेतील घनदाट जंगलांमध्ये हा प्राणी आढळतो. पश्चिम घाटाच्या जंगलामध्ये 'लाजवंती'चे वास्तव्य असून घाटाच्या उत्तरेकडील सिंधुदुर्ग जिल्ह्यापर्यंत या प्राण्याचे अधिवास क्षेत्र मर्यादित आहे. सिंधुदुर्ग जिल्ह्यातही केवळ तिलारी आणि आसपासच्या परिसरात हा प्राणी आढळून येतो. गेल्या महिन्यात राज्य सरकारने ५ हजार ६९२ हेक्टर क्षेत्रावर पसरलेल्या 'आंबोली-दोडामार्ग काॅन्झर्वेशन रिझर्व्ह'ची घोषणा केली. या वनक्षेत्रामध्ये या दुर्मीळ प्राण्याचे दर्शन घडले आहे. स्थानिक निसर्गप्रेमी संजय सावंत, तुषार देसाई, अमित सुतार आणि संजय नाटेकर यांना हा प्राणी दिसून आला. शनिवारी रात्री निसर्गभ्रमंतीदरम्यान 'लाजवंती' हा प्राणी आम्हाला आढळून आल्याची माहिती संजय सावंत यांनी दै. 'मुंबई तरुण भारत'शी बोलताना दिली. या प्राण्याचे छायाचित्र टिपण्यात यश मिळाल्याचे त्यांनी सांगितले.