तानसा अभयारण्यातील पर्यटकांना खुणावणारा टँगो धबधबा

शहापूर : शहापूर तालुका म्हटला की, निसर्गाने मुक्त हस्ते केलेली सौंदर्याची उधळण या ठिकाणी पाहायला मिळते. कसारा घाट, घाटघर, आजा पर्वत, किल्ले माहुली, जांभे धरण, अशोका धबधबा तसेच भातसा, तानसा, मोडक सागर ही धरणे आणि याच परिसरात डोळ्यांचे पारणे फेडणारा निसर्गरम्य परिसर यामुळे मुंबई, पुणे, नाशिक, गुजरातकडील पर्यटकांची पावले वळतात ती शहापूरकडे. यातच आता भर पडली आहे, ती तानसा अभयारण्यातील टँगो धबधब्याची. तानसा अभयारण्यात मोडकसागर ते तानसा असा जो रस्ता जातो त्या ठिकाणी बेलवड गावाच्या पुढे घनदाट झाडीमध्ये हा धबधबा जणू काही लपलेला आहे. या रस्त्याने जाताना या धबधब्याच्या आवाजानेच वाहनचालकांचा गाडीला ब्रेक लागतो व हा धबधबा पाहण्याचा मोह त्यांना आवरता येत नाही. या परिसरात पर्यटकांना तानसा अभयारण्याची भटकंती करता येते. रानभाज्या जवळून पाहता येतात. अभयारण्य असल्यामुळे पक्षांचे वेगवेगळे आवाज कानी ऐकू येतात. कधी ही न पाहिलेले पक्षी नजरेत पडतात. मोडकसागर धरण व तानसा धरण हे देखील भरून वाहू लागल्यामुळे पर्यटकांना सदर धरणे पाहण्याची संधीदेखील मिळते. तानसा धरणाच्या बँक वॉटरला मासेमारी करणार्या आदिवासींच्या तराफ्यावरून धरणात फेरफटका मारण्याचा आनंद घेता येतो, विशेष म्हणजे निसर्ग अभ्यासकांना तसेच छायाचित्रकारांना आणि पर्यटकांसाठी टँगो धबधबा पर्वणीच ठरत आहे.

 

 

आपण जर मध्य रेल्वेने किंवा मुंबई-आग्रा महामार्गाने प्रवास करत असाल, तर खर्डी किंवा आटगाव स्थानकावर उतरावे लागेल. आटगाव येथून प्रवाशी वाहतूक जीपने आठगाव ते अघई असा प्रवास करून रस्त्यात तानसा धरण व या धरणाचे बँक वॉटर पाहता येते. या ठिकाणावरून पुन्हा अघई ते बेलनाला प्रवास केल्यावर या ठिकाणी पोहचता येते. आटगाव ते टँगो धबधबा हे अंतर २८ कि.मी. आहे.

 

तसेच खर्डी वरून प्रवाशी वाहतुकीने जीपने टेंभा येथे जावे लागते आणि या ठिकाणी असलेल्या मोडकसागर धरणाला भेट देऊन पुन्हा टेंभा, बेलवड मार्गे टँगो धबधब्यावर पोहचता येते. खर्डी ते टँगो धबधबा अंतर २० किलो मीटर आहे, तसेच पालघर मार्गे येणार्या पर्यटकांना वाडा मार्गे सोनाळे, कलंभे, बेलवड, असा प्रवास करून पोहचता येते. वाडा ते टँगो धबधबा अंतर हे २४ किमी आहे. हे ठिकाण जंगलात असल्यामुळे खाण्यापिण्याची व्यवस्था या ठिकाणी नाही म्हणून पर्यटकांनी दिवसभराचे खाद्य आपल्या सोबत घेऊन जावे.