डी गुकेशचा ऐतिहासिक विजय! नॉर्वे बुद्धिबळ स्पर्धेत मॅग्नस कार्लसनला चारली पराभवाची धूळ
02-Jun-2025
Total Views |
नवी दिल्ली : (Norway Chess 2025) नॉर्वेतील स्टाव्हांगर येथे सुरू असलेल्या नॉर्वे चेस २०२५ स्पर्धेत भारताच्या १८ वर्षीय बुद्धिबळपटू डी. गुकेश याने माजी विश्वविजेता मॅग्नस कार्लसन याला क्लासिकल फॉरमॅटमध्ये पराभूत करत ऐतिहासिक विजय मिळवला आहे. हा गुकेशचा कार्लसनविरुद्ध क्लासिकल प्रकारातील पहिलाच विजय आहे.
सामना अत्यंत चुरशीचा ठरला. गुकेशने काळ्या मोहऱ्यांनी खेळ करत कार्लसनवर दबाव कायम राखला. कार्लसनने खेळाच्या उत्तरार्धात वेळेच्या दबावात चूक केली आणि त्याचाच फायदा घेत गुकेशने विजय निश्चित केला. या पराभवानंतर मॅग्नस कार्लसनने टेबलवर संतापाने हात आपटला आणि नंतर थेट खोलीतून बाहेर पडला. सोशल मीडियावर अनेकांनी त्याच्या या वागणुकीवर टीका केली आणि त्याला "सोर लूझर" म्हटले.
विजयानंतर गुकेशने प्रतिक्रिया देताना सांगितले, "९९ पैकी १०० वेळा मी हरलो असतो. आज फक्त नशीबाने साथ दिली." त्याच्या या नम्रतेचेही नेटिझन्सनी कौतुक केले आहे. गुकेशच्या आजोबांनीही यावेळी प्रतिक्रिया दिली. ते म्हणाले, "गुकेशचे अंतिम लक्ष्य जागतिक क्रमवारीत अव्वल स्थान मिळवणे हेच आहे." गुकेशचा हा विजय केवळ वैयक्तिक मैलाचा दगड ठरला नाही, तर भारतीय बुद्धिबळाच्या जागतिक यशाची नवी सुरुवात ठरली. त्याने मॅग्नस कार्लसनसारख्या मातब्बर खेळाडूला हरवून जागतिक पातळीवर स्वतःचे स्थान बळकट केले आहे.
अनिशा डुंबरे
मुंबईतील पाटकर-वर्दे महाविद्यालयातून अर्थशास्त्र विषयातत पदवी. सध्या दै. मुंबई तरुण भारत मध्ये वेब उपसंपादक पदावर कार्यरत. लिखाण, वाचन आणि निवेदनाची विशेष आवड. मराठी साहित्य, इतिहास, राजकारण, आणि मनोरंजन विषयांत रस. महाविद्यालयीन काळात वक्तृत्व, कथाकथन, काव्यवाचन स्पर्धांमध्ये सहभाग आणि पारितोषिके.\