बीकेसी भूमिगत बुलेट ट्रेन स्थानकाचे काम वेगात

मुंबई, केंद्रीय रेल्वे मंत्री अश्विनी वैष्णव यांनी महाराष्ट्रातील निर्माणाधीन मुंबई बुलेट ट्रेन स्टेशनला भेट दिली आणि स्टेशनच्या प्रत्यक्ष प्रगतीचा आढावा घेतला. यावेळी त्यांनी माध्यमांशी संवाद साधत स्थानकाच्या प्रगतीचा आढावा दिला.

केंद्रीय मंत्री वैष्णव म्हणाले, "मुंबईतील बीकेसी बुलेट ट्रेन स्थानकाचे काम अत्यंत गतीने सुरु आहे. भूमिगत स्थानकांपैकी तिसऱ्या मजल्याचे काम सुरु आहे. या भूमिगत स्थानकांना आधार आणि मजबुती देणारे काम पूर्ण झाले आहे. आता स्थानकांच्या भिंती उभारण्याचे काम सुरु झाले आहे. यासोबतच भुयारी मार्गाचे कामही वेगात सुरू आहे. बोगद्यांसह महाराष्ट्रात जे काम सुरु आहे त्यांनाही गती आहे. हे स्टेशन मल्टी स्टोरेज इमारत स्वरूपात असेल. स्थानक बी १, बी २ आणि बी ३ स्वरूपात आहे. बी ३ मध्ये गाड्या असतील. बी १ आणि तळमजल्यावर प्रवासी स्थानकात प्रवेश करतील," अशी माहिती केंद्रीय रेल्वेमंत्री अश्विनी वैष्णव यांनी दिली.

मुंबई- अहमदाबाद बुलेट ट्रेन मार्गावरील एकमेव भूमिगत स्थानक असलेले 'मुंबई बुलेट ट्रेन स्थानक' बांद्रा कुर्ला कॉम्प्लेक्समध्ये स्थित आहे. हे स्थानक जमिनीपासून सुमारे २६ मीटर खोलीवर असणार आहे. या स्थानकात प्लॅटफॉर्म, कॉनकोर्स आणि सर्व्हिस फ्लोअर असे एकूण ३ मजले असतील. या कामासाठी सुमारे ३२मीटर (अंदाजे १००फूट) खोलपर्यंत उत्खनन केले जात आहे, जे सुमारे १० मजली इमारतीच्या उंचीच्या बरोबरीचे आहे. या स्थानकात एकूण ६ प्लॅटफॉर्म असतील आणि प्रत्येक प्लॅटफॉर्मची लांबी सुमारे ४१५मीटर असेल (जी १६डब्यांच्या बुलेट ट्रेनसाठी पुरेशी आहे).

या स्थानकासाठी दोन प्रवेश/निर्गम बिंदू नियोजित आहेत. एक मेट्रो लाईन 2बी च्या जवळच्या मेट्रो स्थानकाला सहज प्रवेश मिळावा यासाठी आणि दुसरा एमटीएनएल इमारतीकडे जाण्यासाठी आहे. या स्थानकाची रचना अशा प्रकारे करण्यात आली आहे की, कॉनकोर्स आणि प्लॅटफॉर्म स्तरावर प्रवाशांच्या हालचालीसाठी आणि सुविधा उपलब्ध करून देण्यासाठी भरपूर जागा उपलब्ध असेल. पुरेश्या नैसर्गिक प्रकाशासाठी एक समर्पित स्कायलाइटची व्यवस्था केली गेली आहे.

सुमारे 76% उत्खनन कार्य (अंदाजे 14.2 लाख घनमीटर) पूर्ण झाले आहे. या साइटवर एकूण 1,872,263 घनमीटर भूमीचे उत्खनन करणे आवश्यक आहे. साइटवर 120 क्यूबिक मीटर/तास क्षमतेची तीन बॅचिंग प्लांट्स कार्यरत आहेत. बॅचिंग प्लांटमध्ये बर्फाचे प्लांट आणि चिलर प्लांट असते जे काँक्रीटचे तापमान नियंत्रित करण्यास मदत करते. साइटवर एक आधुनिक काँक्रीट लॅब उपलब्ध आहे. काँक्रीटशी संबंधित सर्व चाचण्या साइटवरच केल्या जातात आणि वेळोवेळी नमुने नामांकित प्रयोगशाळांमध्ये पाठवले जातात. बांधकाम बेस स्लॅबसाठी एम-६० काँक्रीट आणि कॉलमसाठी एम-८० काँक्रीट वापरून केले जाईल. बुलेट ट्रेन स्टेशनसाठी बेस स्लॅब सर्वात खोल बांधकाम पातळी तयार करेल. केवळ बेस स्लॅब कास्टिंगसाठी सुमारे २ लाख घनमीटर काँक्रीट ओतले जाईल. आतापर्यंत २७,००० घनमीटर काँक्रीट ओतण्यात आले आहे. साइटसाठी १००% सेकंट पायलिंग (३३८४ नग), कॅपिंग बीम (२२०३ आरएमटी) आणि फ्लड वॉल (२०७८ आरएमटी) चे काम आधीच पूर्ण झाले आहे.