चिपळूणात पट्टेरी वाघाचा वावर; सह्याद्रीतील 'हा' वाघ कोकणात उतरल्याची शक्यता

मुंबई (विशेष प्रतिनिधी) - रत्नागिरी जिल्ह्यात चिपळूण तालुक्यात वाघाच्या वावरावर शिक्कामोर्तब झाले आहे (tiger spotted in chiplun). तालुक्यातील एका गावात वाघाचा वावर आढळला असून वन विभागाने कॅमेरा ट्रॅप लावले आहेत (tiger spotted in chiplun). याठिकाणी वाघाच्या पावलांचे ठसे मिळाले असून त्याने म्हैस देखील मारली आहे. (tiger spotted in chiplun)

 

 

 

सह्याद्री-कोकण भ्रमणमार्गाचा विस्तार हा महाराष्ट्रातील सह्याद्री व्याघ्र प्रकल्पापासून दक्षिणेकडे कर्नाटकातील काली व्याघ्र प्रकल्पापर्यंत आहे. या भ्रमणमार्गातील महाराष्ट्रातील सह्याद्रीमध्ये १२ वाघांचा वावर आहे. सह्याद्री व्याघ्र प्रकल्पाचा विचार केला असता, याठिकाणी 'एसटीआर-टी १' आणि 'एसटीआर - टी २' अशा दोन वाघांचा वावर आहे. अशा परिस्थितीत आता चिपळूण तालुक्यातील एका गावामध्ये वाघाचा वावर निदर्शनास आला आहे. गावातील म्हैस वाघाने मारली असून त्याठिकाणी पावलांचे ठसे देखील आढळून आले आहेत. म्हशीला खाण्याची पद्धत आणि पावलांच्या ठशांचा आकार हा पाहता, तो वाघच असण्यावर शिक्कामोर्तब झाले देखील. तरी देखील वन विभागाने याठिकाणी कॅमेरा ट्रॅप लावले आहेत. त्यामुळे छायाचित्र मिळाल्यानंतरच वाघाच्या वावर ठोस पद्धतीने समोर येईल. दरम्यान सह्याद्री व्याघ्र प्रकल्पातील 'एसटीआर-टी १' हा वाघ खाली कोकणात उतरल्याची शक्यता व्याघ्र प्रकल्प प्रशासनातील एका सूत्राने व्यक्त केली आहे.

 

 

 

१० हजार ७८५ चौ.किलोमीटर क्षेत्रावर सह्याद्री-कोकण भ्रमणमार्गाचा विस्तार पाहायला मिळतो. या भ्रमणमार्गच्या क्षेत्रामध्ये संरक्षित वनक्षेत्राबरोबरच खासगी आणि सरकारी मालकीच क्षेत्र, गाव, महामार्ग, रेल्वेमार्ग, धरण अशा अनेक गोष्टीचा समावेश आहे. त्यामुळे या भ्रमणमार्गात अनेक ठिकाणी आपल्याला खंड म्हणजेच 'गॅप' आणि अडथळे म्हणजेच 'बाॅटलनेक' दिसतात. अशा परिस्थितीत असलेल्या या भूभागामधील वाघांच्या संख्येचे अवलोकन करण्याचे काम 'डब्लूसीटी'ने वन विभागाच्या मदतीने २०२२-२३ या सालात केले. प्रामुख्याने महाराष्ट्रामध्ये हा अभ्यास केंद्रित होता आणि या अहवालातील गोवा व कर्नाटक राज्यातील वाघांची संख्या ही 'राष्ट्रीय व्याघ्र गणने'च्या अहवालामधून घेण्यात आली. कर्नाटकमधील १७ आणि गोव्यातील ५ वाघांची संख्या ही राष्ट्रीय व्याघ्र गणनेच्या अहवालानुसार नोंदवण्यात आली, तर महाराष्ट्रामधून १२ वाघांच्या छायाचित्रांची नोंद करण्यात आली आहे. ही संख्या केवळ भ्रमणमार्ग भूप्रदेशातील असून 'सह्याद्री व्याघ्र प्रकल्प' किंवा 'राधानगरी वन्यजीव अभयारण्या'सारख्या संरक्षित वन क्षेत्रामधील वाघांच्या संख्येचा यात समावेश नसल्याचे त्यांनी स्पष्ट केले.