यंदा पुण्यात 'अयोध्येतील राममंदिरात' बाप्पा विराजमान होणार!

दरम्यान या देखाव्याचे उद्धाटन करण्यासाठी उत्तर प्रदेशचे मुख्यमंत्री योगी आदित्यनाथ यांना निमंत्रित करण्यात येणार आहे. तसेच 'श्रीं' ची प्राणप्रतिष्ठा राष्ट्रीय स्वयंसेवक संघाचे सरसंघचालक डॉ. मोहन भागवत यांच्या हस्ते होणार आहे.एकीकडे २२ जानेवारी २०२४ रोजी अयोध्येतील राम मंदिरात रामल्लांची प्राण प्रतिष्ठा करण्यात येणार आहे. तर दुसरीकडे या भव्य मंदिराच्या प्रतिकृतीत पुण्यात ६४ कलांच दैवत असणारे गणपती बाप्पा विराजमान होणार आहेत.

मुख्य सभागृहात श्री गणरायाचे मखर सोनेरी रंगाच्या छटांमध्ये असून सभोवती सुशोभित कमानी असणार आहेत. मंदिर परिसर व मार्गामध्ये रामायणातील घटनांचा आढावा चित्र व लेखन स्वरुपात मांडण्यात येणार आहे. बेलबाग चौकातून प्रवेश करताना काल्पनिक रामसेतू उभारण्यात येणार आहे. तेथून भाविकांना मंदिरात प्रवेश करता येईल, हे देखील यंदाचे आकर्षण असणार आहे. याशिवाय भगवान श्रीराम, प्रवेशद्वारावर श्री हनुमंत आणि वानरसेनेच्या वानरांच्या प्रतिकृती देखील लक्षवेधी ठरणार आहेत.