'निसर्गकवी बहिणाबाई चौधरी प्राणीसंग्रहालया'ला अजूनही टाळाच!

मुंबई (समृद्धी ढमाले): पिंपरी चिंचवड महानगरपालिकेतील छत्रपती संभाजीनगर येथे असलेल्या 'निसर्गकवी बहिणाबाई चौधरी प्राणीसंग्रहायला'वर गेल्या अनेक दिवसांपासुन ताशेरे ओढले जात आहेत. या प्राणीसंग्रहालयातील ३६ प्राण्यांचा मृत्यू झाल्याच्या घटनेची चौकशी करावी अशी घोषणा मुख्यमंत्री एकनाथ शिंदे यांनी मंगळवार दि. १२ डिसेंबर रोजी केली आहे. प्राणीसंग्रहालयातील ३६ प्राण्यांच्या मृत्यूची घटना गंभीर असली तरी या प्राणीसंग्रहालयावर इतरही अनेक प्रश्न उपस्थीत केले जात आहेत.

१९९० साली सुरू झालेल्या या छोटेखानी प्राणीसंग्रहालयाला २०१७ पासुन टाळा लागलेला आहे. नुतनीकरणासाठी बंद असलेले हे प्राणीसंग्रहालय उघडण्याची प्रतिक्षा गेली सहा वर्ष स्थानिकांकडून करण्यात येत आहे. नूतनीकरणाच्या कामाला विलंब का होत आहे?, केंद्राकडून दिल्या गेलेल्या निधीचे काय झाले?, गेल्या दोन वर्षांत प्राणीसंग्रहालय सल्लागार समितीची एकही बैठक का झाली नाही? अशा अनेक प्रश्नांनी आता डोकं वर काढलं आहे. याबाबत प्राणीसंग्रहालयातील संबंधित अधिकाऱ्यांशी चर्चा करण्याचा प्रयत्न केला असता त्यांनी फारसा प्रतिसाद दिला नाही. पिंपरी चिंचवड महानगरपालिकेच्या या सर्व कारभारावर प्रश्नचिन्ह उपस्थीत होत असून प्राणीसंग्रहालय लवकरात लवकर सुरू करण्याची मागणी केली जात आहे.

दरम्यान, ३६ प्राणी दगावल्याच्या घटनेबाबत आमदार अश्विनी जगताप यांनी प्रश्नोत्तराच्या तासात मुद्दा उपस्थित केला होता. याला उत्तर देताना मुख्यमंत्री शिंदे यांनी चौकशीचे आदेश देत हे प्राणीसंग्रहालय वनविकास महामंडळाकडे हस्तांतरित करण्याचे निर्देश ही देण्यात आले आहेत.