मेट्रो प्रकल्पाला नवसंजीवनी देणारा 'मेट्रोमॅन'

नवी मुंबईच्या बेलापूर ते पेंधरच्या मेट्रोच्या उदघाटनाची प्रतीक्षा दि. १७ नोव्हेंबर रोजी संपली. कारण मुख्यमंत्री एकनाथ शिंदे यांनी नवी मुंबईच्या नागरिकांच्या समस्या समजून घेत उद्धाटन न करता मेट्रो सुरू करण्याचा महत्त्वपुर्ण निर्णय घेतला. त्यानंतर महाराष्ट्राच्या या विकास प्रकल्पाची चर्चा सर्वत्र होऊ लागली. कारण १९८४ साली कलकत्त्याला देशातील पहिली मेट्रो धावली. पण महाराष्ट्रात मेट्रो सुरु व्हायला तब्बल ३९ वर्ष लागली. आणि लालफितीच्या कारभारात अडकलेली मेट्रो प्रकल्पाची योजना २०१४ साली तत्कालीन मुख्यमंत्री देवेंद्र फडणवीसांच्या महत्त्वाकांशेमुळे महाराष्ट्रात आली. पण २०१९ ला आलेल्या महाविकास आघाडी सरकारच्या काळात महाराष्ट्रातील मेट्रो प्रकल्प रखडले. मात्र पुन्हा येईन म्हणत कमबॅक केलेल्या फडणवीसांनी २०१९ मध्ये सत्तेत येताच या मेट्रो प्रकल्पांना नवसंजीवनी दिली. त्यामुळेच मेट्रो प्रकल्प कुणामुळे रखडला? मेट्रो प्रकल्पामुळे काय साध्य झाले?

पण यात आरे येथील मेट्रो कारशेड कांजूरमार्ग येथे हलविण्याचा दुर्दैवी निर्णय हा केवळ अहंकारातून घेतल्याची टीका खुद्द फडणवीसांनी केली. जर कदाचित त्यावेळी आरे कारशेड कांजूरमार्गला हलविण्यात आली असती तर ४ हजार कोटींचा अतिरिक्त भुर्दंड राज्य सरकाराला सोसावा लागला असता, हे आम्ही नाही तर ठाकरे सरकारने स्थापन केलेल्या समितीनेच सांगितले. त्यामुळे हा भुर्दंड राज्य सरकार आपल्या अहंकारासाठी कुणाच्या माथी मारू इच्छिते? आणि कशासाठी? असा प्रश्न देवेंद्र फडणवीस यांनी त्यावेळी उपस्थित केला होता. पण २०२२ मध्ये मेट्रो-३ च्या ट्रायल रनला हिरवा झेंडा दाखवण्यात आला. ह्या मेट्रो ३ च्या पूर्णत्वानंतर सुमारे १७ लाख प्रवासी प्रवास करू शकणार आहेत. त्यामुळे स्त्यावरील सुमारे सात लाख खासगी वाहनांची संख्या कमी होईल. यामुळे वाहतूक कोंडी कमी होण्याबरोबरच वायू आणि ध्वनी प्रदूषण देखील कमी होईल. तसेच पर्यावरणाचा समतोल राखण्यासही मदत होईल.बरं मग ठाकरेंनी फक्त मेट्रो प्रकल्पालाच विरोध केला का? तर नाही. देशातील पहिला मुंबई – अहमदाबाद बुलेट ट्रेन प्रकल्प देखील तत्कालिन मुख्यमंत्री उद्धव ठाकरे यांच्या कार्यकाळात रखडला, असा आरोप रेल्वेमंत्री अश्विनी वैष्णव यांनी केला. महाराष्ट्रात बुलेट ट्रेनच्या विविध कामांना आवश्यक असलेल्या परवानग्या त्याच्या कार्यकाळात देण्यात आल्या नाहीत. मात्र, सरकार बदलताच आताच्या सरकारने सर्व परवानग्या दिल्या असून प्रकल्पाला गती दिली जात आहे. त्यामुळे आता बुलेट ट्रेन आणि मेट्रो प्रकल्प मुंबईकरांना प्रगतीपथावर नेणार आहेत. पण तरीसुद्धा विरोधकांची डोळेझाकपणे विरोध करण्याची प्रवृत्ती काही केल्या जात नाही.