पायलटच्या प्रसंगावधानामुळे 'केदारनाथ'मध्ये टळली मोठी दुर्घटना

24-May-2024

Total Views | 95

डेहराडून : केदारनाथमध्ये पायलटच्या प्रसंगावधानामुळे मोठी हेलिकॉप्टर दुर्घटना टळली आहे. भाविकांना केदारधाम मंदिरात घेऊन जाणारे हेलिकॉप्टर तांत्रिक बिघाडामुळे अपघातातून थोडक्यात बचावले. टेक ऑफ केल्यानंतर अचानक झालेल्या बिघाडामुळे हेलिकॉप्टरचा तोल सुटला आणि हवेत गटांगळ्या घेण्यास सुरूवात केली, मात्र पायलटने प्रसंगावधान दाखवत हेलिकॉप्टरचे इमर्जन्सी लँडिंग करून सर्व प्रवाशांना सुखरूप वाचवले.

या अपघातात हेलिकॉप्टरमधील सहा प्रवाशांपैकी कोणीही जखमी झाले नाही. या घटनेमुळे केदारनाथ मंदिरात भाविकांना घेऊन जाणाऱ्या हेलिकॉप्टरच्या सुरक्षा व्यवस्थेवर पुन्हा एकदा प्रश्न निर्माण झाला आहे. याआधीही केदारधाममध्ये हेलिकॉप्टरचे अनेक अपघात झाले आहेत, त्यापैकी बहुतांश हेलिकॉप्टर एकामागून एक टेक ऑफ होत असल्याने त्यांची देखभाल योग्य प्रकारे न केल्याने हे अपघात झाल्याचं समोर आले होते.

VT-CLR, Leonardo A119 Koala, Kestrel Aviation, Kedarnath base camp today❗

Miraculous escape from what looks like loss of directional control (rudder/servo failure?). Six 360° turns before setting down outside the helipad. Remarkably well controlled by the pilot. All safe. pic.twitter.com/LKpaUXuok4
— Kaypius (@realkaypius) May 24, 2024

उत्तराखंडच्या रुद्रप्रयाग जिल्ह्यातील केदारनाथ धामला जाण्यासाठी पायी मार्गासोबतच हवाई सेवाही उपलब्ध आहे. त्यासाठी अनेक ठिकाणी हेलिपॅड बांधण्यात आले आहेत. शुक्रवारी क्रिस्टन एव्हिएशन कंपनीच्या हेलिकॉप्टरने सकाळी ७ वाजता ६ भाविकांसह फाटा येथून केदारनाथ धामसाठी प्रस्थान केले. धाम येथे बांधण्यात आलेल्या हेलिपॅडच्या आधी हेलिकॉप्टरच्या राऊटरमध्ये समस्या निर्माण झाली होती. त्यामुळे हेलिकॉप्टरचा तोल सुटू लागला.

पायलटने हेलिकॉप्टर हेलिपॅडवर उतरवण्याचा प्रयत्न केला, मात्र तो यशस्वी होऊ शकला नाही. यानंतर हेलिकॉप्टरने हेलिपॅडच्या जवळपास १०० मीटर आधी इमर्जन्सी लँडिंग केले. मिळालेल्या माहितीनुसार, सर्व प्रवाशांची वैद्यकीय तपासणी करण्यात आली असून, त्यात कोणीही जखमी नसल्याची पुष्टी झाली आहे.