मावळत्या वर्षाचा क्रीडावेध...

आपण सर्वसाधारणतः तीन वर्षे आचरतो. भारतीय कालगणनेतील स्वधर्माचे गुढीपाडव्याचे हिंदू वर्ष, ख्रिस्ती कालगणनेनुसारचे सर्वत्र अपरिहार्य असलेले प्रचलित जानेवारी महिन्यात सुरू होणारे ग्रेगरी दिनदर्शिकेनुसारचे वर्ष आणि एप्रिलला येणारे आर्थिक वर्ष. चीन, ग्रीक, पारशी, मुस्लीम अशा आपल्या-आपल्या धर्मांनुसार ती-ती धर्माभिमानी जनता निष्ठेने स्वतःचे कालगणनेवर आधारित वर्ष आचरतात. २०२४च्या ख्रिस्ताब्दाचे स्वागत तसेच हिंदू वर्ष, आर्थिक वर्ष आणि प्रचलित आंग्ल वर्ष या तीन वर्षांपैकी एक असणारी ग्रेगरी वर्षाखेर २०२३ डिसेंबरच्या अखेरच्या सप्ताहात साजरी करण्याचा हा काळ. इसवी १००० पर्यंत युरोपातील सर्व ख्रिश्चन देशांनी आणि आधुनिक युरोपीय साम्राज्यवादाच्या विस्ताराने संपूर्ण जगाने त्याचा स्वीकार केला. त्यांच्या पंचांगाचा, आंग्ल दिनदर्शिकेचा दिनपत्रिकेचा (डायरीचा) हा काळ. या वर्षाच्या सांगतेची/स्वागताची महोत्सवी धामधूम नाताळापासून सुरू होताना आपण बघतो. असे जरी असले तरी जे ख्रिश्चन नाहीत व जे स्वधर्माभिमानी आहेत, ते ‘हॅपी न्यू इयर’चे स्तोम न माजवता, अपरिहार्यता म्हणून आपल्या भिंतीवरील दिनदर्शिका बदलतात. आपण आपल्या दिनपत्रिका आणतो (अनेकांना ती स्नेहभेट प्राप्त होत असते). असे आपण सारे २०२३ला निरोप देण्यास आता सज्ज आहोत.