श्रीरामलला प्राणप्रतिष्ठा दीपोत्सवाने साजरी करा

नवी दिल्ली : अयोध्येतील भव्य श्रीराम मंदिरात श्रीरामललाची प्राणप्रतिष्ठा झाल्यानंतर जगभरातील कोट्यवधी राम भक्तांना सायंकाळी दीपोत्सव साजरा करावा, असे आवाहन श्रीराम जन्मभूमी तीर्थक्षेत्र ट्रस्टतर्फे शुक्रवारी करण्यात आले आहे. अयोध्येतील भव्य श्रीराम मंदिरात येत्या २२ जानेवारी रोजी श्रीरामललाच्या नुतन विग्रहाची प्राणप्रतिष्ठा होणार आहे. त्या पार्श्वभूमीवर श्रीराम जन्मभूमी तीर्थक्षेत्र ट्रस्टतर्फे भारतासह जगभरातील रामभक्तांसाठी आवाहन करण्यात आले आहे. त्यामध्ये सकाळी ११ ते दुपारी १ वाजेदरम्यान गावात, परिसरात आणि रहिवासी वसाहतींमध्ये असलेल्या मंदिरांमध्ये एकत्र जमण्याचे आवाहन करण्यात आले आहे.

प्राणप्रतिष्ठा कार्यक्रमाचे दूरदर्शनसह अन्य वाहिन्यावर थेट प्रक्षेपण होणार असून रामभक्तांनी मोठ्या पडद्यावर शंख व घंटानादाच्या निनादात एकत्रितपणे प्राणप्रतिष्ठे कार्यक्रमाचे साक्षीदार व्हावे, असे सांगण्यात आले आहे. प्राणप्रतिष्ठेच्या दिवशी सूर्यास्तानंतर सायंकाळी आपापल्या देवघरात दिवा लावावा आणि त्यानंतर कोट्यवधी घरांमध्ये दीपोत्सव साजरा करण्याचे आवाहन करण्यात आले आहे. त्याचप्रमाणे प्राणप्रतिष्ठेनंतर सहकुटुंब सहपरिवार श्रीरामललाच्या दर्शनास येण्याचेही निमंत्रण ट्रस्टतर्फे देण्यात आले आहे.

असे आहे भव्यदिव्य श्रीराम मंदिर
ट्रस्टतर्फे जारी करण्यात आलेल्या निवेदनामध्ये श्रीराम मंदिराची वैशिष्ट्ये नमूद करण्यात आली आहेत.

श्रीराम मंदिर पारंपरिक नागर शैलीत बांधण्यात आले आहे.

• मंदिराची लांबी (पूर्व-पश्चिम) ३८० फूट, रुंदी २५० फूट आणि उंची १६१ फूट आहे.
• मंदिर तीन मजली असून प्रत्येक मजल्याची उंची २० फूट आहे. मंदिरात एकूण ३९२ खांब, ४४ द्वार आहेत.
• तळमजल्यावरील गर्भगृहात (गाभारा) भगवान श्रीरामाच्या बालस्वरुप विग्रह विराजमान होणार असून पहिल्या मजल्यावर श्रीराम दरबार असेल.
• नृत्य मंडप, रंगमंडप, गूढ मंडप (सभा मंडप), प्रार्थना मंडप आणि कीर्तन मंडप असे एकूण पाच मंडप आहेत.
• खांब आणि भिंतींमध्ये देवी-देवतांच्या मूर्ती कोरण्यात आल्या आहेत.
• पूर्वेकडून ३२ पायऱ्या (उंची १६.५ फूट) चढून सिंहद्वारमधून मंदिरात प्रवेश मिळेल (अपंग आणि वृद्धांसाठी रॅम्प आणि लिफ्टची सोय करण्यात आली आहे).
• सभोवताली गोल भिंत (आकाराची) - लांबी ७३२ मीटर, रुंदी ४.२५ मीटर आहे. उद्यानाच्या चार कोपऱ्यात सूर्य, शंकर, गणपती, देवी भगवती अशी चार मंदिरे. उद्यानाच्या दक्षिणेला हनुमान आणि उत्तरेला अन्नपूर्णा मातेचे मंदिर आहे.
• मंदिराच्या दक्षिणेकडे पौराणिक सीताकूप आहे.
• उद्यानाच्या बाहेर दक्षिण दिशेला महर्षि वाल्मिकी, महर्षि वशिष्ठ, महर्षि विश्वामित्र, महर्षी अगस्त्य, निषादराज, माता शबरी आणि देवी अहिल्या यांचे प्रस्तावित मंदिर.
• दक्षिण-पश्चिम भागात नवरत्न कुबेर माळावर असलेल्या शिवमंदिराचा जीर्णोद्धार आणि रामभक्त जटायू राज यांच्या मूर्तीची स्थापना.