राम नाईक यांच्या ‘चरैवेति! चरैवेति!!’च्या तामिळ आवृत्तीचे रविवारी प्रकाशन

 

 

मुंबई : उत्तर प्रदेशचे माजी राज्यपाल राम नाईक यांच्या आत्मकथनपर ‘चरैवेति! चरैवेति!!’ पुस्तकाचा तामिळ अनुवाद रविवार, २६ सप्टेंबर रोजी मुंबईत दुपारी ४ वाजता षण्मुखानंद सभागृहात (सहावा मजला) प्रकाशित होणार आहे. ‘साऊथ इंडियन एज्युकेशन सोसायटी’ व ‘महाराष्ट्र तामिळ वेल्फेअर असोसिएशन’च्या संयुक्त विद्यमाने आयोजित कार्यक्रमात लेखक राम नाईक यांच्यासह माजी मुख्यमंत्री देवेंद्र फडणवीस, भारतीय जनता पक्ष, तामिळनाडूचे अध्यक्ष पी. अण्णामलाई व मुंबई भाजपचे उपाध्यक्ष, आमदार कॅप्टन तमिल सेल्वन उपस्थित राहाणार आहेत.

 

राम नाईक यांचे पुस्तक आता तामिळ अनुवादासह १२ भाषांमध्ये - मराठी, हिंदी, इंग्रजी, संस्कृत, गुजराती, उर्दू, सिंधी, असमिया, तामिळ, जर्मन, फारसी व अरेबिक उपलब्ध असून, त्याखेरीज मराठी, हिंदी व इंग्रजीमध्ये ‘ब्रेल लिपी’तही आहे. तामिळ भाषेचे प्रकाशन ‘चाणक्य वार्ता’चे प्रकाशक संपादक डॉ. अमित जैन यांनी केले. स्वातंत्र्योत्तर काळात राजकीय व्यक्तीचे आत्मकथनपर लेखन १२ विविध भाषांमध्ये असणे हा एक विक्रमच मानला जातो.

 

कोरोनासाथीमुळे सदर कार्यक्रमास मर्यादित संख्येत प्रत्यक्ष उपस्थित राहता येणार असल्यामुळे कार्यक्रम फेसबुकवरून http://www.facebok.com/bjpsouthcellmumbai/live_videos/द्वारा थेट प्रक्षेपित करण्यात येणार आहे. ‘महाराष्ट्र तामिळ वेल्फेअर फेडरेशन’चे अध्यक्ष कराते आर मुरुगन, ‘साऊथ इंडियन एज्युकेशन सोसायटी’चे अध्यक्ष डॉ. व्ही. शंकर व मुंबई भाजप दक्षिण भारतीय सेलचे अध्यक्ष एन. मुथु कृष्णन यांनी सर्वांना या प्रकाशन समारंभात आभासी मंचावरून सामील होण्याचे आवाहन केले आहे.