कुंभ मेळ्याच्या तयारीसाठी प्रयागराज रेल्वे स्थानकावर अत्याधुनिक तंत्रज्ञानावर आधारित अशी सुरक्षा यंत्रणा बसविण्यात आली आहे. कर्नाटकातील हुबळी रेल्वे स्थानकातही अशाच प्रकारची कडक सुरक्षा व्यवस्था आहे. देशातील २०२ रेल्वेस्थानकांमध्ये अशी अत्याधुनिक तंत्रज्ञानावर आधारित सुरक्षा यंत्रणा बसविण्याची रेल्वेने तयारी सुरु केली आहे. रेल्वे सुरक्षा दलाचे महासंचालक अरुण कुमार यांच्याकडून ही माहिती देण्यात आली.

रेल्वे स्थानक सर्वबाजूंनी सुरक्षित करण्यात येणार आहे. रेल्वे स्थानकाची सुरक्षा वाढवताना रेल्वे स्थानाकाला एकूण किती प्रवेशद्वारे आहेत. तसेच गरजेच्या वेळी त्यातील किती प्रवेशद्वारे बंद करता येतील. या सगळ्याचा अभ्यास केला जाणार आहे. रेल्वे स्थानकातील अनावश्यक आणि खुले मार्ग भिंत उभारून कायमचे बंद करण्यात येणार आहेत. रेल्वेच्या अन्य प्रवेशद्वारांवर सुरक्षा दलाचे जवान तैनात असतील. अशी माहिती रेल्वे सुरक्षा दलाचे महासंचालक अरुण कुमार यांनी दिली.

या २०२ रेल्वे स्थानकांवर त्यांच्या प्रवेशद्वारावर सुरक्षा तपासणीचे टप्पे असतील. सुरक्षा तपासणीचे हे सर्व टप्पे पार केल्यानंतरच प्रवाशांना रेल्वे स्थानकात आत प्रवेश दिला जाईल. यामुळे विमानतळावर जसे प्रवासी सुरक्षा तपासणी पूर्ण करण्यासाठी वेळेआधी विमानतळावर पोहोचतात. त्याचप्रमाणे रेल्वे स्थानकावरही आता प्रवाशांना वेळेआधी पोहोचावे लागणार आहे. बाहेरगावी जाणाऱ्या गाड्यांसाठी रेल्वे प्रवाशांनी सुरक्षा तपासणी पूर्ण करण्यासाठी रेल्वे स्थानकावर किमान १५ ते २० मिनिटे आधी पोहोचणे अपेक्षित आहे. अन्यथा गाडी सोडण्याची वेळ प्रवाशांवर येईल.

रेल्वे स्थानकांवर इंटिग्रेटेड सिक्युरिटी सिस्टम उभारण्यास मंजुरी देण्यात आली आहे. सीसीटीव्ही कॅमेरे, बॅग स्क्रिनिंग, बॉम्ब शोधक आणि वाशक यंत्रणा या सगळ्या गोष्टींचा समावेश या इंटिग्रेटेड सिक्युरिटी सिस्टममध्ये असणार आहे. इंटिग्रेटेड सिक्युरिटी सिस्टमची यंत्रणा ही रेल्वे स्थानकांच्या प्रवेश द्वारांवर असणार आहे. रेल्वे स्थानकांवरील सुरक्षा अशाप्रकारे वाढविण्यासाठी अशी यंत्रणा उभारण्यासाठी ३८५.०६ कोटी रुपयांचा खर्च येणार आहे. रेल्वे स्थानकाच्या प्रवेशद्वारावर प्रवाशांच्या सुरक्षा तपासणीमध्ये रिअल टाइम सॉफ्टवेअरचाही वापर करण्यात येणार आहे. या सॉफ्टवेअरद्वारे प्रवाशांच्या चेहऱ्याची ओळख पटवली जाईल. या तपासणी दरम्यान एखादा गुन्हेगार आढळून आल्यास सुरक्षा यंत्रणा लगेच अलर्ट होतील. ही माहिती अरुण कुमार यांनी दिली.