विधान परिषदेच्या जागांचे निकाल आज होणार जाहीर

मुंबई : विधान परिषदेच्या पदवीधर आणि शिक्षक मतदार संघाच्या चार जागांच्या मतमोजणीला आज सकाळपासून सुरुवात करण्यात आली आहे. कोकण-मुंबई पदवीधर आणि नाशिक-मुंबई शिक्षक मतदार संघ अशा एकूण चार जागांसाठी ही मतमोजणी घेण्यात येत असून आज दुपारपर्यंत निकाल समोर येणार आहेत.

गेल्या सोमवारी विधान परिषदेच्या या चार जागांसाठी मतदान घेण्यात आले होते. विशेष म्हणजे भाजप, राष्ट्रवादी आणि शिवसेना या तीन पक्षांमध्ये या चारही जागांसाठी चुरशीची लढत पहायला मिळणार आहे. त्यातही कोकण पदवीधर मतदार संघामध्ये हे तिन्ही पक्ष आमनेसामने असणार आहेत. कोकणामध्ये भाजपचे उमेदवार निरंजन डावखरे यांनी ऐनवेळी राष्ट्रवादीची साथ सोडल्यामुळे डावखरे यांचा परभाव करण्यासाठी म्हणून राष्ट्रवादीने कंबर कसली आहे. भाजपला सडेतोड उत्तर देण्यासाठी म्हणून राष्ट्रवादीने नजीब मुल्ला यांना आपली उमेदवारी दिली आहे. तर सेनेनी देखील याठिकाणी उडी घेऊन संजय मोरे यांना आपली उमेदवारी दिली आहे. त्यामुळे कोकणामध्ये हे तीन पक्ष आमनेसामने असणार आहेत.