लुई ब्रेल यांचे वंशज

 

मला पत्रकारितेत करिअर करायची खूप इच्छा होती. त्यासाठी मी मुंबई विद्यापीठातून पत्रकारितेत ‘एम.ए.’चे शिक्षण घेतले. शिक्षण घेणे तुलनेने सोपे होते, पण या क्षेत्रात नोकरी मिळवणे तसे अवघडच. अंधत्वामुळे मला या क्षेत्रात नोकरी मिळवणे अवघड गेले. त्यामुळे प्रत्यक्ष पत्रकारिता करता आली नाही, पण माझे लिखाण सुरूच होते. मी लिहित असल्यामुळे माझ्या लिखाणाची नोंद बर्‍याच लोकांनी घ्यायला सुरू केली होती. ‘संपर्क’ नावाची संस्था चालवणार्‍या आणि ‘नवी उमेद’ नावाचे फेसबुकवर एक पेज चालवणार्‍या मेधा कुलकर्णी यांनी मला लिहिण्याची एक संधी दिली. एक अंध मुलगी म्हणून माझे बालपण कसे गेले आणि अंध आई म्हणून मी माझ्या लहान डोळस मुलाला कशी सांभाळते, अशा दोन बाजू घेऊन मी त्या पेजसाठी 17 भागांची एक मालिका लिहिली. ‘पाहिलेलं, न पाहिलेलं, मनातलं’ या शीर्षकाखाली मी ते लिखाण केले. त्यानंतर मला लिहिण्यासाठी अनेक संधी मिळत गेल्या. ‘कोविड’ काळात एका दैनिकात एक सदर लिहायची संधी मला मिळाली. जवळपास वर्षभर मी ते सदर लिहिले. देशभरातील 52 अंध व्यक्तींच्या मुलाखती घेऊन त्यांचे रोजचे जगणे कसे असते, त्यांचा संघर्ष आणि त्यांनी त्या संघर्षावर केलेली मात अशा गोष्टींवर आधारित ते सदर होते. त्याच सदरावर आधारित माझे ‘कवडसे’ हे पुस्तक प्रकाशित झाले. आशुतोष जावडेकरांच्या हस्ते त्याचे प्रकाशन झाले. दिग्दर्शिका सई परांजपे यांनी त्याला प्रस्तावना आणि अभिनेत्री सोनाली कुलकर्णी यांनी शुभेच्छा दिल्या आहेत.