ना घर के रहे, ना घाट के

 

 

 

मुंबई-ठाणे-पुणे या व अन्य शहरांतील मराठी मतदारांच्या मनात उबाठा सेनेविरोधातील नाराजी इतके दिवस सुप्त होती. मात्र, निवडणुकीतील प्रचाराने ती आता धारदार झाली आहे. ज्या पक्षावर गेली अनेक दशके प्रेम केले आणि त्यांच्या नेत्यांच्या घोडचुकाही पदरात घेत त्यांना निवडून दिले, अशा नेत्यांनी केवळ वैयक्तिक सत्ताकांक्षेपोटी आपल्याच मतदारांच्या पाठीत सुरा भोसकला. ज्यांना सत्तेवर बसविण्यासाठी मते दिली, त्या भाजप या एकनिष्ठ सहकार्‍याचा विश्वासघात करून ज्यांना सत्तेपासून दूर ठेवले होते, त्या काँग्रेस-राष्ट्रवादीच्या नेत्यांच्या गळ्यात घालून वैयक्तिक सत्तालोलुपता पूर्ण करण्याचा उबाठा सेनेचा धक्का मराठी मतदारांना सहन झाला नाही. उबाठा सेनेच्या नेत्यांच्या सुदैवाने गेली अडीच वर्षे राज्यात कोणत्याच निवडणुका झााल्या नसल्याने मतदारांना आपली नाराजी व्यक्त करण्याची संधीच मिळाली नव्हती. आता लोकसभा निवडणुकीत महाविकास आघाडीविरोधातील ही नाराजी व्यक्त होताना दिसत आहे. ही नाराजी अन्य कोणत्याही मतदारांपेक्षा मराठी मतदारांमध्ये खूपच अधिक आहे. ज्या मराठी माणसाच्या नावावर आणि हिंदुत्त्वाच्या मुद्द्यावर आजवर उबाठा सेनेच्या नेत्यांनी सत्तेची फळे चाखली, त्यांनाच या पक्षाच्या नेत्यांनी गृहित धरले, याचा राग आता मतपेटीतून व्यक्त होईल.

हा विश्वासघात राजकीय स्वरूपाचा नव्हता, तर तो सांस्कृतिकही होता. मराठी माणसाने हिंदुत्त्वाचे राजकारण स्वीकारल्यापासून राज्यात भाजप आणि अखंड शिवसेनेला व्यापक पाठिंबा मिळत गेला. आपण हिंदुत्व सोडले नसल्याचा दावा उबाठा सेनेचे नेते जरी करीत असले, तरी त्यांची कृती आणि उक्ती नेमकी त्याच्या उलट आहे. एकीकडे मुस्लीम मतदारांना गोंजारताना त्याचवेळी आपण हिंदुत्त्व सोडले नसल्याचा दावा केल्यामुळे मुस्लीम मतदारांमध्ये गोंधळ आणि नाराजी निर्माण होत होती. दुसरीकडे मोदी यांच्यावर बिनबुडाचे आणि पातळी सोडून आरोप करताना मुस्लीम मतदारांना गोंजारण्याच्या धोरणामुळे हिंदुत्त्ववादी मतदार नाराज होत होते. छत्रपती संभाजीनगर मतदारसंघात ही कुचंबणा प्रखरतेने दिसून येते. तेथील उबाठा सेनेचे उमेदवार चंद्रकांत खैरे हे एकाच वेळी मुस्लीम आणि हिंदू मतदारांना खूश करण्याचा केविलवाणा प्रयत्न करताना दिसले. पण, त्यामुळे ते दोन्ही मतदारांमध्ये अविश्वासाचे वातावरण निर्माण करीत आहेत. त्याचा फायदा उचलण्यास ‘मजलिसे उत्तेहादुल मुसलमीन’ हा असदुद्दिन ओवेसी यांचा पक्ष टपूनच बसला आहे. राज्यातील मुसलमान या पक्षाला आपला पक्ष मानतात. त्यामुळे बहुसंख्य मुस्लीम मतदारांची मते याच पक्षाला मिळण्याची शक्यता आहे.

 

उरलीसुरली कसर राज ठाकरे यांनी भरून काढली आहे. जे मराठी मतदार अजूनही या पक्षाचे समर्थन करतात, त्यांना आता महायुतीला मते देण्याचे आवाहन राज ठाकरे यांनी केले आहे. पुण्यातील सभा असो, रत्नागिरीतील असो की ठाण्यातील, राज ठाकरे यांनी उबाठा सेनेवर जोरदार हल्ला चढविला आहे. त्यांच्या उत्तम वक्तृत्वाने श्रोते भारावून जाताना दिसतात. यामुळे उबाठा सेनेतील निराशा अधिकच गहिरी होत जात आहे. मुंबई, नाशिक, पुणे यासारख्या शहरी आणि राजकीयदृष्ट्या सजग मतदारांना आपल्या बाजूने वळवून घेणे उबाठा सेनेला अवघड जात आहे. त्यांनी आपल्या मर्जीतील वृत्तवाहिन्या आणि लाळघोट्या पत्रकारांद्वारे सहानुभूतीचे वातावरण निर्माण करण्याचा प्रयत्न केला असला, तरी सोशल मीडियामुळे आजकाल शहरी मतदार खूपच जागरूक झालेला असल्याने या प्रयत्नाला पुरेसे यश आल्याचे दिसत नाही. थोडक्यात, असंगाशी संग करून उबाठा सेना हा पक्ष हिंदीतील म्हणीनुसार ‘ना घर का ना घाट का’ राहिला आहे. हिंदू व मुस्लीम मतदारांमधील अविश्वासाची मोठी किंमत या पक्षाच्या उमेदवारांना चुकती करावी लागणार आहे.