धर्मांतरित आदिवासींना आरक्षणाचा लाभ घेण्याचा अधिकार नाही!

शिवाजी पार्कपासून सुरु झालेल्या या महारॅलीचा समारोप जांबोरी मैदानात आयोजित महासभेने झाला. जनजाती सुरक्षा मंचाच्या वतीने आयोजित करण्यात आलेल्या या महारॅलीमध्ये आदिवासी समाजाने धर्मांतर करुन ख्रिश्चन आणि मुस्लिम झालेल्या लोकांना अनुसूचित जातींना मिळणारे आरक्षण रद्द करण्याची मागणी केली.

महारॅलीला संबोधित करताना करिया मुंडा म्हणाले की, “निसर्गाची पूजा करणारा आदिवासी हा हिंदूच आहे. पण अज्ञानामुळे आणि आदिवासींच्या गरीबीचा फायदा घेऊन त्यांचे धर्मांतरण करण्यात आले. आज देशभरात साडेआठ कोटी आदिवासींची संख्या आहे. त्यापैकी 80 लाख ख्रिश्चन तर 12 लाख मुसलमान म्हणून उघडपणे धर्मांतरित झाले. मुळात देशात आदिवासींकरिता केवळ सात टक्के आरक्षण आहे. धर्मांतरित आदिवासींमुळे इतर आदिवासी शासकीय योजना आणि आरक्षणाच्या लाभांपासून वंचित आहेत. सूर्य, चंद्र, वनस्पती, प्राणी, जलवायू, आकाश यांची पूजा करणारे आदिवासी हेच खरे सनातनी आहेत,” असेही ते म्हणाले.

या रॅलीमध्ये हजारो आदिवासी समाज बांधव सहभागी झाले होते. त्यासोबतच मंचावर आदिवासी समाजाच्या विकासासाठी काम करणार्‍या ठमाताई पवार, संतोष जनाठे, ह.भ.प. वाघुले महाराज उपस्थित होते. त्यासोबतच जनजाती सुरक्षा मंचाचे कोकण प्रांत संयोजक विवेक करमोडा आणि सहसंयोजक सुदाम पवार हे देखील उपस्थित होते.

हजारोंच्या संख्येने उपस्थित आदिवासी समाजाच्या घोषणांनी छत्रपती शिवाजी महाराज पार्क ते जांभोरी मैदानाचा रस्ता दणाणून सोडला. सकाळी पडलेला पाऊस आणि त्यानंतर मुंबईतील दमट वातावरण रॅलीमध्ये सहभागी झालेल्या आदिवासी बांधवांच्या उत्साहावर परिणाम करु शकला नाही. या रॅलीमध्ये सहभागी झालेल्या आदिवासी बांधवांनी ’जो भोलेनाथ का नहीं, वह मेरी जात का नहीं’ अशा घोषणा दिल्या.

 

आज संविधान दिवस आहे. आजच्याच दिवशी भारतरत्न डॉ. बाबासाहेब आंबेडकर यांनी देशाला संविधान दिले होते. त्यावेळी संविधानात आरक्षण कोणाला मिळणार याचा स्पष्ट उल्लेख होता. पण पूर्वीच्या सरकारच्या दबावामुळे अदिवासींचे मोठ्या प्रमाणावर धर्मांतरण झाले. ही लोक धर्मांतरण सुद्धा करतात आणि आरक्षणाचा सुद्धा लाभ घेतात. हे कसे चालणार? म्हणून जनजाती सुरक्षा मंचाने रॅली आयोजित केली आहे. या रॅलीमध्ये हजारोंच्या संख्येने जनजाती समूह उपस्थित आहेत. जोपर्यंत डि-लिस्टिंग होत नाही, तोपर्यंत हा लढा सुरु राहणार!